Hardangerbadet får hjelp og slepp nye vilkår

– Me er der me er, og det å gå mot auke i stønaden vil vera bakstreversk.

Otto Thillmann (MDG) samanfatta fleirtalssynet slik då heradsstyret 19. juni slutta seg til ein auke i det kommunale bidraget til anlegget på 2,1 millionar til 3,1 millionar kroner i år og neste år. I tillegg løyver dei folkevalde like mykje til å dekkja underskot i 2022.

Fremja vilkår

Håvard Gjerde (R) var den einaste som førte nye moment inn i den gamle debatten. Han ville utnytta løyvinga til å stilla fleire krav til badeanlegget: ei fylgjekortordning og gratis inngang for dei som nyttar bassenga som del av fysikalsk behandling.

– Når Kvam herad går inn med mykje pengar, er det viktig at me syter for at bassenget vidarefører tilbod som kjem innbyggjarane til gode, sa han.

Kari Mostad (MDG) meiner det ikkje er til å tru at folk må betala både for sjølve behandlinga og inngangspengar.

Gjerde fekk sympati og røyster frå SV, Kari Mostad (MDG) og Jostein Moldsvor (KrF), men ikkje fleirtal. Fleire, også Gjerde sjølv, påpeika at det vil vera uvanleg å gripa inn i drifta av eit privat selskap gjennom slike vilkår, men han meiner ikkje at det er urimeleg.

Even Øyri (Ap) minte om at folk må betala til dømes både for å gå til legen og for medisinen. Om nokon ynskjer gratis «terapibading», bør det takast opp i budsjettsamanheng, meiner han.

Jostein Moldsvor (KrF) oppmoda på vegner av rådet for menneske med nedsett funksjonsevne om at det vert teke tak i saka. Han ottast at manglande behandling på grunn av dårleg råd kan få negative økonomiske fylgjer i andre budsjett. Ordførar Torgeir Næss (Ap) meiner den rette måten er ei tilskotsordning, ikkje å be leverandøren gje låge prisar til nokre kundegrupper.

Prispolitikk

I tillegg ynskte Gjerde å vedta ei oppmoding til Hardangerbadet om å senka prisane, som han meiner bør vera meir på nivå med prisane i Vossabadet og Osbadet. Som HF skreiv nyleg, har Hardangerbadet høgare prisar for enkeltbillettar, men rabattordningar som gjev lågare prisar for familiar.

Ordførar Torgeir Næss (Ap) meiner det vil vera spesielt om Kvam herad som kunde skal fastsetja prisane for andre kundar, og at det vil vera eit klart brot på avtalen med Hardangerbadet. Men eit avtalebrot er også det auka kommunale tilskotet, repliserte Gjerde.

– For innbyggjarane betyr det at me betalar mykje meir enn avtala, sa han.

Oppmodinga om lågare prisar fall mot røystene til R, SV og Kari Mostad (MDG).

Kan gå klar rekning

Ei rekkje kausjonistar har bunde seg til å betala inntil éin million kroner årleg for å dekkja eventuelle underskot. Så langt har dei punga ut kvart år. Med auken i den kommunale overføringa kan dei sleppa billegare unna, avhengig av dei økonomiske resultata til badeselskapet.

Halvard Lilletveit (Ap) meiner at ein stiller opp som kausjonist med opne augo, og at det er vanskeleg å angra seg.

– Du veit kva du gjer og må ta konsekvensen av det, sa han.

Varaordførar Frode Nygård (Frp) er samd og påpeika at føresetnadene for drifta var klare frå starten. Han minte om at kausjonistane i si tid måtte «blø 100 prosent» i satsinga på «kulturhotellet» i Norheimsund.

– Det er noko du må ta stilling til den dagen du skriv under, sa han.

Thillmann er delvis samd, men meiner samstundes at det er litt rart at private aktørar skal ta rekninga for noko det demokratiske fleirtalet har vedteke.

– Det kjennest ikkje rett, sa han.

– Altfor lågt

Svein J. Stuve (Sp) meiner at tilskotet frå Kvam herad som han røysta for i 2017, var altfor lågt, og meiner det er på høg tid å koma i mål med ein sum som er til å leva med for det fantastiske og flotte anlegget. Han sa at anlegget framleis er veldig billeg for Kvam herad.

– Me fekk eit anlegg for ein brøkdel av prisen for å byggja eit sjølv, hevda han.

Torgeir Næss (Ap) synest ikkje anlegget framleis vil vera veldig billeg, men nærare marknadsprisen etter tilskotsauken. Politikarane trudde i 2017 at dei kunne koma langt betre ut, men slik har det ikkje gått, påpeika han, og nemnde pandemien og auka prisar som medverkande årsaker.

Han trur ikkje det er sannsynleg at anlegget vil oppnå dei besøkstala Hardangerbadet AS skisserte då Kvam herad gjekk inn i prosjektet i 2017.

– Hadde me gått inn for dette om me visste det me veit no? Kanskje ikkje. Eller kanskje, om me visste om ringverknadene, sa ordføraren.

– Det var ei sterk overtyding om at dette skulle fungera. Eg kjenner irritasjon over at det som var garantert, ikkje stemte, sa Kari Mostad (MDG).

Frp støtta ikkje auken i bidraget til anlegget, og ville berre yta éin million kroner til å dekkja underskot i 2022, med ei opning for auke til 1,5 millionar, om Hardangerbadet Eigedom AS yter like mykje. Partiet meiner det er naturleg å venta og tinga om nye vilkår når avtalen om samarbeid og drift skal tingast om før 2025.

Varaordførar Frode Nygård (Frp) understreka at styreleiar Dag Jarle Aksnes i Hardangerbadet i 2020 uttala at selskapet vil klara seg sjølv att etter pandemien.