Hardangerbadet ber om 850.000 kroner

Ifylgje søknaden frå dagleg leiar Martin Vik vil selskapet tapa 650.000 kroner i inntekter som fylgje av stenginga i periodane 3.—21. februar og 25. mars—11. april. I tillegg skal selskapet ha betala ut 200.000 kroner i løn i periodane.

Det stipulerte inntektstapet består av fylgjande:

• 100.000 kroner i medlemspengar og 130.000 kroner i enkeltbillettar i februar.

• 100.000 kroner i medlemspengar og 270.000 kroner i enkeltbillettar i mars — april.

• 50.000 kroner som fylgje av avlyste arrangement, nærare bestemt to symjeklubbar som skulle leiga bassenget.

I søknaden skriv Vik at det er urimeleg at Hardangerbadet må dekkja lønskostnaden i ti dagar ved kvar stenging, før Nav kjem inn i biletet. Han opplyser at det ser ut til at inntektstapet vert mindre enn 30 prosent i periodane med stengt anlegg i år, noko som medfører at selskapet ikkje kan få kompensasjon frå staten.

— Kompensasjonen vil bidra til at underskotet i 2021 kan verta lågare, ikkje høgare enn budsjettert, skriv Vik.

Hardangerbadet fekk i fjor 850.000 kroner i statleg kompensasjon for tap då anlegget var stengt i tre månader frå mars til juni. I tillegg fekk selskapet 150.000 kroner i stønad frå det kommunale kraftfondet til drifta i form av marknadsføring.

I fjor hadde selskapet eit underskot på 3,5 millionar kroner. Heradsstyret løyvde i mars 1,5 millionar kroner frå sparegrisen til å bidra til å dekkja det.

Kvam herad har fått tildelt 1.581.575 kroner av potten som staten har sett av til kompensasjon for tap som fylgje av pandemien. Heradsstyret skal fordela pengane.