Hardanger maskin AS er konkurs

Måndag fekk han oversikt over maskinparken og stoda i selskapet. Mykje av maskinparken er leasa. Det største kravet i buet er frå DnB, og er på om lag 30 millionar. Det er langt over kva selskapet er verdt. Verdien i aktiva er mellom fem og åtte millionar.

– Då forstår ein at det er ein betydeleg ubalanse, seier Romstad.

Hovudutfordringa til selskapet er problem med maskinparken. Ifylgje Romstad vart ei av hovudmaskinene teken i ein flaum i Telemark i fjor vår. Sjølv om det er ei forsikringssak og maskina etter planen skal reparerast, har prosjektet stoppa.

Kraftig vekst

Hardanger maskin vart etablert i 2011. Det året hadde verksemda éi gravemaskin, éin tilsett og nokre hundre tusen i omsetning. I 2020 var omsetninga på nær 100 millionar kroner. 2022-tala viser ei omsetning på om lag 76 millionar kroner og eit årsresultat på 1,8 millionar kroner.

Dei siste åra har verksemda i hovudsak jobba med kraftverkstunnelar. Den fyrste tunnelboremaskina kom i 2018, og nummer to vart levert året etter. Selskapet bora mellom anna tunnelen til Tokagjelet Kraftverk.

– Vil truleg opphøyra

No skal panthavarar og tilsette fylgjast opp, seier Romstad. Lista over dei tilsette tel 27 personar. Nokre har vore permitterte den siste tida. Om lag 20 personar var i aktivt arbeid ved opning av konkursen, etter det Romstad har fått opplyst.

Tysdag jobba han mellom anna med å senda ut eit orienteringsskriv til dei tilsette.

Det er ikkje sett i gang rekonstruksjon av selskapet. Mest sannsynleg vil selskapet opphøyra, opplyser bustyraren.

HF har ikkje lukkast i å koma kontakt med styreleiar og hovudaksjonær Tore Eiken tysdag. Tillitsvald i verksemda, Per Johan Gaup, ynskjer ikkje å kommentera saka.

Oppbodsmeldinga skal handsamast i Hordaland tingrett 25. mars.

HF gjer merksam på at Tore Eiken er son til ektemannen til mor til redaktør Sigbjørn Linga. Red.