Har søkt om tilskot til sikring av friluftsareal

Det skriv rådmannen på heimesida. Ho viser til ei sak i Dagsavisen. Heradet har sendt ni søknader om såkalla sikringsstønad. Berre 24 av dei 356 kommunane i landet har søkt.

Det er ikkje fyrste gongen Kvam utmerkjer seg på denne måten.

– Me har hatt ein god «drive» på slike søknader i mange år, og det kjem nok fleire etter kvart, seier ordførar Torgeir Næss (Ap) til Dagsavisen.

Område som vert ofte nytta, vil heradet leggja til rette ytterlegare med mellom anna høve til grilling og enkle hus der ein kan byta klede før ein badar. For stort sett er det snakk om strender som heradet allereie eig, men heradet har også kjøpt nokre eigedomar, seier Næss til avisa. Han fortel at satsinga er grunngjeven med trivnad for folket og omsynet til reiselivet.

Ordføraren seier det alltid er mogleg å ta seg eit bad i fjorden i ein kommune som ligg slik til som Kvam, men at ein ynskjer å gjera det lettare også å ta med seg ungar og å koma til med rullestol, slik at ein kan fremja meir fysisk aktivitet.

– Me ligg langs den vakre Hardangerfjorden og satsar på allmenn tilgang i område med høg kvalitet, noko som gjer oss til ein attraktiv stad å både vitja og bu, seier rådmann Anita Hesthamar til Dagsavisen.

Leiar for samfunn, næring og kultur i Kvam, Jon Nedkvitne, påpeikar at noko som også er unikt for våre område, er at nokre av friluftsområda ligg midt i sentrum. Dei er ein viktig del av tettstadutviklinga i våre største tettstadar, Øystese og Norheimsund, litt som i «Syden», seier Nedkvitne.

Miljødirektoratet skriv på heimesida at staten kan dekkja inntil 50 prosent av sikringskostnaden, medrekna kostnader, med lokale område som i hovudsak vert brukte av innbyggjarane. Ein kan få dekt 100 prosent av sikringskostnaden, medrekna kostnader, med regionale område der det er sannsynleg at over halvparten av brukarane kjem frå andre kommunar. Staten kan òg dekkja inntil 50 prosent av kostnadene med grunnleggjande istandsetjingstiltak.