Har sett i gang nytt forprosjekt
Resultatet av det førre forprosjektet for utbetring av fylkesveg 48 mellom Mundheim og Holdhus var kostnadsrekna til over éin milliard kroner. Det nye har mål om billegare tiltak.
Det kjem fram av eit referat etter eit digitalt orienteringsmøte om forprosjektet. Fire representantar for avdelinga for infrastruktur og veg i Vestland fylkeskommune møtte to frå Kvam herad og éin frå Bjørnafjorden kommune 15. november.
Bente Øyre i utgreiingsseksjonen, og ansvarleg for forprosjektet, presenterte planane. Det fyrste forprosjektet inneheldt mellom anna to store bruer og ein tunnel, og er ikkje økonomisk mogleg å gjennomføra, heiter det i møtereferatet.
Av presentasjonen går det fram at utfordringane er smal veg og varierande breidd på vegen, smale og gamle bruer, dårleg kurvatur, dårleg sikt, få møteplassar og manglande tilbod for mjuke trafikantar.
Trafikktryggleiken skal vurderast, og friluftsliv, kulturmiljø, naturressursar og naturmangfald skal kartleggjast i prosjektet.
Rådmannen i Kvam stilte spørsmål om krysset og rundkøyringa på Mundheim er med i planane. Svaret var at fylkeskommunen må sjå på det, ifylgje referatet. Rådmannen ytra at det er viktig å utbetra bruene, slik at dei ikkje vert ståande att som flaskehalsar. Ho var også oppteken av å vareta fiskeinteressene i elva i Mundheimsdalen, ifylgje referatet.
Hildegunn Furdal, fylkeskommunal kommunekontakt for Kvam, opplyste i møtet at det er sett i gang eit «forprosjekt light» for fylkesvegen mellom Mundheim og Tørvikbygd. Prosjekta kan sjåast i samanheng, heiter det i referatet.
Forprosjektet skal vera ferdig i desember neste år. Kartlegging av behov er allereie starta. I starten av 2025 skal alternativ for utbetring av vegen verta vurdert, medan kostnadsvurderinga skal gjerast på hausten. Forprosjektet er forankra og finansiert i regional transportplan (RTP), men det er ikkje sett av pengar til tiltak der, heiter det i referatet.
