Har sendt badstove på høyring
Nyvinninga nær båthamna på Tangerås er eit lite steg nærare å verta røyndom.
Som HF skreiv nyleg, søkte symjegruppa i Strandebarm Idrettslag nyleg om dispensasjon for den vedfyrte badstova på 59 rutemeter, og Kvam herad sende nyleg søknaden på høyring til overordna styresmakter.
Tiltaket i «Skrotagjelet» føreset dispensasjonar frå både byggjeforbodet i strandsona og arealføremålet friområde i reguleringsplanen.
– Plasseringa er grunngjeven med at området er uspart, overgrodd og uframkomeleg. Greiner og hageavfall vert dumpa og brent der. Badstova vil gjera området meir tilgjengeleg og gje meirverdi til området. Nærområde har frå før grillhytte, marina og turstiar. Ingen naturverdiar går tapt. Badstova skal vere open for ålmenta, og Strandebarm Idrettslag er ansvarleg for reinhald, drift og vedlikehald, samanfattar rådmannen i høyringsbrevet.
Ho skriv at ho er positiv til folkehelsetiltak og vil «så langt mogleg tilrå dispensasjon ut frå opplysningane som ligg føre». Stova vil gjera området meir mangfaldig attraktivt, og plasseringa er ikkje i konflikt med andre føremål.
Grunneigar i området er Kvam herad. Fristen som styresmaktene har for å uttala seg i saka, er 9. januar.
