Har sagt opp pendlarkontora
Dei to pendlarkontora i Kvam Kan Huset i Øystese går over i historia.
Kvam herad har nemleg sagt opp avtalen med huseigar Kvam Kan Huset AS om leiga av dei to kontora, som var resultatet av ei politisk satsing frå partia Ap, Frp, KrF og H i fleirtalskoalisjonen i førre valperiode.
Målet deira var å tilby gratis plassar til utflytte kvemmingar eller andre som vil arbeida i ein fellesskap når dei er i Kvam. Prisen for leiga var 6.000 kroner i månaden.
I budsjettet for 2025 er ikkje ordninga finansiert, utan at ho vart spesifikt drøfta i det politiske budsjettordskiftet før jul. Leigeavtalen om kontora vart difor sagd opp før nyttår. Med ei oppseiingstid på tre månader vil heradet i utgangspunktet stå utan kontora frå 1. april.
Slik var bruken i starten
Kvam herad har i samband med oppseiinga bede om å få oppdatert bruksstatistikk for kontora. HF fekk i mars i fjor eit oversyn frå Kvam herad over bruken frå starten våren 2023. Oversynet kom frå Kvam Kan Huset, som har administrert utlånet på vegner av heradet.
På nær eitt år hadde 27 personar tinga kontora i alt 64 gonger og nytta dei totalt i 154 dagar. Statistikken viste at 5 av brukarane hadde kome frå Kvam herad sjølv. Dei hadde i alt nytta kontora i 7 dagar. Av dei 22 andre brukarane kom 85 prosent frå andre kommunar enn Kvam.
Brukarane har hatt høve til å tinga kontora inntil 5 dagar i slengen og inntil 20 dagar samla i året.
Då HF sjekka «kontorkalenderen» denne veka, såg ingen av dei to kontora ut til å vera tinga i 2025.
Vil vita meir
Pendlarkontora er ikkje nemnde i budsjettframlegget frå rådmannen for 2025. Ordførar Torgeir Næss (Ap) seier til HF at han var klar over at tiltaket var finansiert i berre to år, men at det ikkje var nokon som tenkte på det då politikarane arbeidde med budsjettet før jul.
Han opplyser at han har bede rådmannen om informasjon om omfanget av bruken og om korleis heradet har reklamert for tilbodet. Han har inntrykk av at mange ikkje har fått kontora med seg, sjølv om tilbodet vart marknadsført i sosiale medium i starten.
– Det er naturleg å spørja om tilbodet var godt nok marknadsført, seier ordføraren til HF.
Les også:
