Har plukka opp saksa i Strandebarm

– Den første veka har gått veldig bra. Eg har hatt mykje å gjera. Det verkar som om mange tykkjer det er kjekt at det er frisør i Strandebarm att, sa Rebecca Gjerde Berge fredag. Ho har teke over salongen etter Silje Håbrekke.

Berge fortel at ho kjem frå Strandebarm, men budde nokre år andre stader før ho flytta attende til Strandebarm for tre år sidan. Ho har erfaring som frisør frå både Bergen og Gjermundshamn.

– Då eg såg at den tidlegare eigaren skulle gje seg, tenkte eg at det kunne vera noko for meg. Det er trong for ein frisør i Strandebarm, sidan det er langt til neste frisør, seier ho.

Med ny eigar har det vorte nokre endringar. Vegger er måla, møblar skifta ut og det har kome nokre nye produkt i hyllene.

– Mange har kommentert at salongen har endra seg, og fleire seier at dei tykkjer det er blitt fint, seier Berge.

Planen er å ha ope kvar dag utanom sundag.

– Eg prøver det til å byrja med i alle fall. Er det ikkje nok kundar, kan det vera eg må avgrensa opningstida litt. Framover vert det viktig å gjera folk klar over at salongen er open att. Eg har inntrykk av at ikkje alle har fått det med seg, seier ho.

Dyr straum, dyre matvarer og høgare renter har gjort at mange har mindre pengar å rutta med. Berge fryktar ikkje det skal føra til at folk slutta å gå til frisør.

– Håret sluttar ikkje å veksa sjølv om tidene er litt dårlegare, seier ho.