– Har nådd fram med viktige punkt

Næss seier han kjem til å arbeida politisk for å få punktet med omkøyringsvegar flytta saman med punktet om auka stønad til rassikring av fylkesvegar, men er elles glad for at vegane vert nemnde. Han reknar med at det fyrst og fremst er fylkesveg 49 og 79, medrekna vegen gjennom Tokagjelet, det i praksis er snakk om.

Han er elles nøgd med at rassikring er høgt prioritert, og slår fast at det vert spanande å følgja debatten om Hordfast på E39 i og med at fylkesrådmannen ikkje er udelt positiv til å setja prosjektet raskt i gang. Brua over Bjørnafjorden vil støvsuga området for vegkroner i lang tid, meiner Næss.

Han set pris på at «armen» frå E134 til Bergen er nemnd i prioriteringslista. Denne skal bidra til verdiskaping i heile den indre delen av gamle Hordaland, meiner han.

– Er det prosjekt du saknar?

– Å nemna konkrete prosjekt på fylkesvegar i NTP-samanheng har lite for seg, sjølv om me i vårt innspel har nemnt Tokagjelet. Ein må håpa på generelle formuleringar om omkøyringsvegar og rassikring, seier han.

Også Haug er glad for at hordalandsdiagonalen er teken med. Dessutan set han pris på at strekkja på Byrkjeneset og riksveg 13 er høgt prioriterte prosjekt, og at fylkesrådmannen ikkje vil satsa på ferjefri E39 med det fyrste.

Han meiner dette vitnar om at fråsegna som vart send frå Kvinnherad, Kvam, Ullensvang, Samnanger og Bjørnafjorden kan ha hatt ein effekt, sjølv om Kvinnherad ifølgje ordføraren har trekt seg frå henne i ettertid. Etter hans syn har ein nådd fram med viktige punkt. Haug skulle elles gjerne sett den indre E39-traseen greidd ut og ei endå sterkare satsing på rassikring.

Ordføraren seier han vil bruka dagane til å arbeida for at den fylkeskommunale fleirtalskonstellasjonen ikkje lèt andre parti få sterk påverknad når saka skal avgjerast.

Haug seier at ein generelt ikkje må vera redd i distrikta for å stå opp for det ein meiner og prioritera tydeleg. Elles viser det seg at utkantane, særleg indre strok, tapar for sentrum og for kystområda, seier han.

– Om alle skal vera vener med alle og ikkje torer å prioritera, vatnar ein ut uttalane, seier han.