Har lagt stein på stein på Mundheim
Laurdag var det ei noko uvanleg opning på Mundheim. Då vart det markert at kaien er komen på plass att.
Arvid Skogseide i Mundheim Grendautval skrytte av prosjektet som har gått føre seg der den gamle Holmakaien låg. Der har bygdefolk stått på for å få på plass ein ny kai som kjem grenda til gode.
– Det har vorte veldig fint her, konstaterte Skogseide.
Kaien er eit samarbeid mellom grendeutvalet, næringslivet og Bergen og omland friluftsråd. Lars Einar Torgilstveit frå friluftsrådet fortalde om prosessen til dei frammøtte. Han understreka at lokal arbeidskraft er viktig.
Lang prosess
Avtalen om området vart inngått mellom friluftsrådet og grunneigaren i 2017. Då var planane for området framleis berre lause tankar og vyar.
Fyrst for eit år sidan var det bestemt kva som skulle gjerast, fortel Skogseide. Då vart det laga teikningar, og søknad vart send til Kvam herad. Også teikningar av den gamle Holmakaien vart funne fram.
Skogseide vonar at bygda er glad for at det oppgraderte friluftsområdet er klart til bruk. I tillegg til kaien og badeplassen er det kome til eit grillhus og benker nede i fjøra.
Promenade i kjømda
Mundheimsfolket gjev seg ikkje enno. På opninga lufta fleire tanken om ein promenade mellom badeplassen og den gamle ferjekaien, der det offentlege toalettet ligg.
Ein gang- og sykkelveg ligg allereie i reguleringsplanen, opplyser Herleif Tveit. No gjeld det å få politikarane til å handla, seier han. Som mangeårig politikar veit han kor vanskeleg det kan vera å få dei folkevalde til å sjå utkantane.
– Det er i alle fall ein ordførar som veit kor Mundheim ligg! seier han og ler.
Skogseide har tru på at ein promenade kan verta mykje nytta både av lokale og besøkjande. Fyrst og fremst vil han gje ein trygg veg for badeinteresserte som kjenner at naturen kallar, meiner han.
– Slik det er no, lyt dei gå rett ut i fylkesvegen.
Torgilstveit seier at friluftsrådet meir enn gjerne er med på fleire prosjekt på Mundheim, til dømes ein promenade i sentrum. Han understreka at rådet har ansvar for å forvalta også Salbuvika.
Ryddar bygda
Fleire av dei frammøtte hadde vore med på ryddedugnad tidlegare på dagen. Denne gjekk føre seg i regi av ulike lokale lag og organisasjonar. Det vart rydda både i fjøra og langs bekker og elvar før det var servert mat i Grannehallen.
– Det er god dugnadsånd på Mundheim, fastslo Torgilstveit, som tidlegare på dagen representerte Mundheimselva Grunneigarlag.
Nokre i dugnadsgjengen brukte litt tid på å få på plass det siste tilskotet til friluftsområdet, nemleg eit overbygg til tønnegrillane. Dette har lenge stått klart hjå Peder Nernæs på Nes.
– Eg var usikker på når me skulle setja det på plass, men det høvde bra no, sa Nærnes.
Han er ein av fleire som skrytte av kor fint området har vorte.
– Dette kan me vera stolte av, sa han.
