Har jobba for badstove i to år. No ligg ballen hjå Kvam herad.
Idrettslaget har søkt om dispensasjon for å bygga i strandsona.
På båtkaien i Strandebarm tar eldsjelene Mona Svanevik Ekanger og Olav Sletvold imot oss, og viser fram friområdet og alle fasilitetane.
– Dette er jo verkeleg perla i Hardanger, seier Ekanger.
Her på Tangeråsneset er det allereie blant anna kafé, grillhytte og badestrand. Alt er bygd på dugnad, fortel duoen.
No jobbar dei, saman med fleire andre i Strandebarm Idrettslag, for å få lov til å bygga ei badstove her.
– Det vil gjera det lettare å bruka området heile året, og det er jo ei glede, seier Ekanger.
Olav Sletvold meiner at badstova vil vera eit gode for heile bygda, og for gjestane som kjem til hamna.
Men det tar tid. Det har allereie gått to år sidan aktørane starta prosessen.
Har søkt om dispensasjon
– Her tilrådde Kvam herad at me kunna bygga badstova, seier Sletvold og peiker ned på badestranda.
Heradet meinte det ville vere ei god løysing å legga stova til området som allereie er sett av til badeformål.
Men fleire i Strandebarm var skeptiske. Dei meinte at stova ville ta for stor plass i eit allereie lite område, og at den kunne vera til hinder.
Idrettslaget har derfor foreslått ei plassering rundt 50 meter lenger borte frå badeplassen og båthamna.
Sletvold viser veg.
– Dette har blitt kalla «Skrotagjelet». Ein brukte å kasta greiner og anna hageavfall ned her, seier han og peiker ned den vesle bakken til vasskanten.
– Det er ikkje akkurat noko å sjå på. Det hadde berre vore fint om det kunna brukast til noko, seier han.
Men også her er det hinder i vegen. Dette området er regulert til «friområde», og då er det i utgangspunktet ikkje lovleg å bygga der.
Idrettslaget har derfor søkt kommunen om dispensasjon frå forbodet.
Håper på bygging i vinter
Heradet vurderer søknaden, opplyser plan- og byggjesakssjef i Kvam herad, Heidi E. Ørjansen. Deretter må saka på høyring. Heradet vil sidan gjera vedtak.
Idrettslaget og resten av Strandebarm må nok dermed smørja seg med endå meir tolmod.
– Men me håper på rask handsaming, slik at me kan få bygga i vinter, seier Sletvold.
