Har ikkje rapportert om tilstanden
I juni 2023 bad dei folkevalde i Kvam om ein tilstandsrapport om bassenget i Ålvik. Enno er ikkje vedtaket fylgt opp.
«Heradsstyret bed rådmannen om å få utarbeidd ein tilstandsrapport for bassenget i Ålvik. Bassenget er viktig for bygda, og ein rapport kan brukast som grunnlag for vurdering av kommunalt tilskot til naudsynt vedlikehald og utbetring.»
Slik lydde heradsstyrevedtaket i fjor sommar. Enno er ingen rapport lagd fram for heradsstyret. Vedtaket nådde nemleg aldri fram til byggavdelinga, opplyser Stein Rykkje. Han er leiar for avdelinga for forvalting, drift og vedlikehald av bygg i Kvam herad.
I 2. tertialrapport i år opplyste rådmannen vel å merka dei folkevalde om at arbeidet ikkje er starta. Ho viste til eigedomsstrategien, som vart vedteken i september. I strategien er det opplyst at vedlikehaldsetterslepet i symjehallen og garderobane summerer seg til 7,7 millionar kroner. Reknestykket er bygt på erfaringstal og kvalifisert synsing, opplyser Rykkje. Anlegget er for dyrt i drift og har svært høgt energiforbruk, og det tekniske anlegget «kan når som helst bryta saman». Badeanlegget treng såleis totalrenovering, heiter det i strategien.
Per brukar vart energi- og vedlikehaldskostnaden med skulen og bassenget i Ålvik i eigedomsstrategien stipulert til 14.711 kroner i 2023. Berre Tørvikbygd skule og gymsal kosta meir av skulane: 18.878 kroner per hovud. Vilkåra for reknestykka er ein energikostnad på 1 kroner per kilowattime og ein vedlikehaldskostnad på 114 kroner per rutemeter per år.
Bassenget i Ålvik skulle leggjast ned då Hardangerbadet vart reist, men politikarane ombestemte seg og valde å vidareføra drifta, på vilkår av at Ålvik Idrettslag tok seg av henne med eit kommunalt tilskot på 250.000 kroner i året.
Eit av vilkåra i vedtaket er at drifta kvart år vert evaluert, og at driftskostnadene vert presenterte, i samband med at budsjettet vert lagt fram. Det vart ikkje fylgt opp dei fyrste åra, noko rådmannen forklara med pandemien i 2020–2022. Sidan har det vore evalueringsmøte med idrettslaget, men ingenting har vorte lagt fram i samband med budsjettet.
Når budsjettet vert presentert for heradsstyret 14. november, vil det visa seg om det skjer i år.
