Har hatt mange båtgjester

Fleire har fått augo opp for Strandebarm Marina, og hamna vert stadig meir populær.

– I sommar vert det nok ny rekord i tal gjestedøger, fortel hamnesjef Daniel Bu.

Han har ansvar for å organisera vedlikehald og dugnad i marinaen heile året. Det meste vert gjort før sommaren byrjar.

– Me må jo ha alt på stell, så gjestene får eit fint opphald, seier Bu.

Fartøya som kjem, er inntil 60 fot store. Dei fleste båtane er norske, men der har også vore nokre utanlandske seglbåtar. Ifølgje Bu er det plass til rundt femti båtar i hamna.

– Mange skryter av staden og kjem att år etter år, fortel han.

Det har skjedd mykje i marinaen dei siste åra. Mellom anna har det kome plantekassar, minigolfbane og bølgjedempar.

– Me prøver å fornya oss litt kvart år, seier Bu.

Får skryt

Kurt Sollesnes er leiar i Jondal Båthamn. Han fortel at hamna har fått nytt betalingssystem i år, noko som er til stor hjelp. I tillegg er badet og servicebygget pussa opp.

– Me får mykje skryt for bygget, fortel Sollesnes.

Både bubilar og båtar er velkomne. Dei fleste av båtgjestene er norske, men det kjem i tillegg tilreisande frå Tyskland, Frankrike, England og Nederland. Båtane dukkar som regel opp i fellesferien, medan bubilane har lengre sesong.

– Det har kome fleire gjester i år enn i fjor, seier Sollesnes.

Hamna har 15 båtplassar, og fartøya ligg der oftast berre éi natt. Vêret betyr mykje. Ifølgje Sollesnes trekkjer mange til stadar med fleire butikkar og restaurantar dersom det er meldt dårleg vêr.

Kjem for pizza

Båthamna i Herand har om lag ti gjesteplassar. Formann i båtlaget, Jorunn Selsvik, fortel at besøkstala er vêravhengige.

– Dei store båtane ligg her gjerne over helga om det er fint, seier ho.

Også mange småbåtar er innom. Ifølgje Selsvik er det populært med dagstur over fjorden for å eta pizza i Herand. Det er stort sett nordmenn som vitjar hamna. Selsvik har ikkje besøkstal frå sommaren, men det har kome båtar jamt og trutt.

– Gjestene lurar på litt av kvart: kvar dei kan eta og gå på tur, og kva dei kan finna på elles, fortel Selsvik.

Nytt av året er ein betalingsapp som gjer prosedyren enklare for både nordmenn og utlendingar. Hamna har også eit sørvisbygg med toalett, dusj, vaskemaskin og tørketrommel.

Vil ha badstove

I Norheimsund gjestehamn er det flest norske båtar innom. Geirmund Storaas, styreleiar i Norheimsund Hamneutvikling, fortel at det har vore ein auke i talet på utanlandske fartøy i år. Mange seglbåtar har funne vegen til hamna i sommar. Hamna vert driven på dugnad.

– Me har mange flinke frivillige, seier Storaas.

Hamna har plass til om lag 50 båtar. Det er juli månad som er travlast. Ifølgje Storaas trekkjer mange inn i fjorden om det er dårleg vêr langs kysten, for her er det lunare. Det er vanleg å overnatta i hamna i opp til fem dagar.

– Mange er nøgde og vil koma att fleire gongar, seier Storaas.

Han fortel at Norheimsund Hamneutvikling ynskjer å byggja badstove i hamna.