Har funne ny trasé
Herand Idrettslag håpar ei endring i traseen skal gjera det lettare å få løyve til å byggja sherpasti til Samlen.
Den opphavlege planen var at stien skulle følgja dagens tursti frå Åsleitet til Samlen. Men mellom anna på grunn av vanskar med å finna ein eigna parkeringsplass har laget no endra meining.
I ein e-postkorrespondanse mellom leiaren i arbeidsgruppa til idrettslaget, Reidun Haugen Dalseth og Malin Jordal, fagansvarleg for byggjesaker i Ullensvang kommune, kjem det fram at laget vil endra første del av traseen. Planen er no at stien skal starta ved Mælsvegen. Traseen følgjer ein gammal sti til Samlen. Idrettslaget meiner det vil vera mindre krevjande å gjera den trygg, samstundes som det ikkje trengst like mange trappetrinn.
To parkeringsalternativ
Idrettslaget har funne to moglege parkeringsplassar ved Mælsvegen. Den eine er på eit område der det vart teke ut stein til hyttetomter. Plassen er regulert til parkering til hytter som ikkje er bygde. Den andre er ein velteplass i området der den nye traseen startar. Grunneigarane skal ifølgje Dalseth vera positive til planane.
Jordal trur det vert vanskeleg å få løyve til å laga parkeringsplass i det første området dersom dette er regulert til parkering for hyttetomter. I så fall krevst dispensasjon frå reguleringsplanen. Ein slik dispensasjon trur ho det vert vanskeleg å få.
Det andre forslaget er på ein velteplass. Det betyr at området er definert som landbruks-, natur- og friluftsområde i kommuneplanen. Skal ein bruka området til parkeringsplass, trengst ein dispensasjon frå arealføremålet.
Treng løyve og dispensasjon
Jordal opplyser at sidan Mælsvegen er ein kommunal veg, er det naudsynt å søkja om løyve til å laga ei ny avkøyrsle til parkeringsplassen. Denne må vera klar før kommunen kan handsama byggjesøknaden.
Ho skriv at kommunen rår sterkt til å avklara parkeringsspørsmålet før søknaden om å byggja sherpasti vert send ut på høyring.
I ein tekst publisert i Herand Bygdeblad skriv Dalseth at representantar for verksemda som skal byggja stien, var på synfaring av den nye traseen i august. Ei gruppe sherpaer er venta i september. Håpet er at arbeidet kan byrja då.
