Håpar på sikring etter ulukke
Kvamskogen Vel vonar kryssingsstaden i Langvotnevatnet vert sikra.
Utspelet kjem i kjølvatnet av ulukka førre sundag kveld. Éin person var måndag framleis sakna etter at båten deira vart ført med straumen til fossen øvst i Tokagjelet.
— Ulukka står fram som tragisk og uforståeleg. Me håpar difor at kommunen kan ta naudsynte kontaktar i denne samanhengen for å sjå på korleis området kan sikrast for liknande ulukker, skriv styreleiar Eva Grimstad i Kvamskogen Vel i eit brev til ordførar Torgeir Næss.
Det har vore vanleg praksis at fleire hytteeigarar har kryssa Langvotnevatnet på eit smalt punkt for å koma seg til og frå hyttene. Alternativet er ein lang omveg til fots. Det er ikkje kjent at praksisen har ført til ulukker tidlegare.
Likevel meiner Grimstad at det er naturleg å sjå på korleis ein kan hindra nye ulukker, til dømes med ei form for hinder mot fossen eller ei bru.
Ordførar Næss seier til HF at Kvam herad vil vurdera innspelet frå vellaget. Heradet er ikkje grunneigar på staden.
Les også:
