Håpar på pengar til leirskule
Hardangerakademiet har søkt næringsfondet i Ullensvang kommune om 250.000 kroner.
Pengane skal gå til å etablera leirskular for elevar på 7.–10. trinn.
Akademiet vonar òg på ein stønad på 250.000 kroner frå Sparebankstiftinga Hardanger. Ein eigeninnsats vil vera verd 80.000 kroner. Den største utgiftsposten, 150.000 kroner, gjeld oppgradering av kjøken og overnattingsrom.
Prosjektet Jondal Leirskule skal ha ansvar for den forretningsmessige drifta. Kommunen skal ha ansvar for det pedagogiske opplegget, med bidrag frå akademiet. Undervisinga vil innehalda mellom anna teori om fred og konfliktløysing, berekraftig utvikling og livet i fjorden og ferskvatn. Klima og miljø står òg på agendaen. Det vert ekskursjonar med temaa moderne mjølkeproduksjon, smoltproduksjon, lakseoppdrett, skiferdrift med meir.
Per Eikeland vil leia leirskuleprosjektet, som vil verta administrert av Ida Sørheim. Målgruppa er fyrst og fremst skular i Vestland. Ein ventar å kunna inngå avtale om to til fire leirskuleveker i haustsemesteret 2022.
Ein lærar i halv stilling i Ullensvang kommune skal bidra i leirskulen, heiter det i ein avtale mellom dei to partane.
– Vonleg vil me trenga meir enn ein lærar i 50 prosent stilling. Viss leirskulen skal vera i drift heile året, vil det vera trong for fleire fulle lærarstillingar. Me må jobba oss inn på ein marknad, seier Eikeland.
