Håpar på ein heit kveld
Ei rekkje politiske tungvektarar entrar scenen i Kunsthuset Kabuso når HF inviterer til valdebatt tysdag.
Redaktør Sigbjørn Linga, som sjølv skal leia debatten, fortel at for avisa er dette ei storsatsing.
– Alle dei fast tilsette vil vera på jobb. Ein Boeing 747 bør ikkje ramla ned i Krokavatnet denne kvelden. Då har me eit problem. Me får kryssa fingrane for at det vert ein roleg kveld alle andre stader enn i Kabuso, seier han.
Dersom ingen melder forfall, vil toppkandidatane frå alle dei ti partia som stiller liste i Kvam, sitja i panelet.
– Det tyder på at partia satsar på denne debatten. Det er me veldig glade for, seier Linga.
– Send spørsmål!
Han fortel at debatten skal ha to hovuddelar. I den første vert det ein generell debatt om eit utval tema. I den andre delen skal politikarane svara på spørsmål frå folk flest. Folk flest vert oppmoda om å senda HF spørsmål både før og under debatten, gjennom kva som helst kanal, medrekna telefon og personleg frammøte.
Ingen av dei som spør vil verta namngjevne. Om avsendaren ynskjer at me stiller spørsmålet til utvalde politikarar, er det fint om dei seier frå om det, presiserer bladstyraren.
– Kvifor arrangerer avisa valdebatt?
– Me ønskjer å vera ein sentral arena for politisk debatt. Eigentleg til alle tider, men særleg i samband med valet. Me vil gjerne at vår debatt skal vera den store debatten i Kvam før kvart val.
Kommers og katedral
Dagleg leiar Kjellaug Camilla Skaar Ljones representerer den kommersielle delen av HF, som altså er med på å skipa til debatten. Om nokon reagerer på at børs – HF Reklame – og katedral – redaksjonen – vert blanda, kan ho forstå det. Men i ei såpass lita verksemd er alternativet i praksis ingen debatt. Mange førebuingar og små brikker må på plass, og til dei krevst mange hender, påpeikar ho.
– Og ikkje minst mange tommeltottar. Dei står eg for, seier Linga.
Ljones stikk ikkje under stol at det å samla kreftene på huset til eit stort arrangement byggjer både samhald og merkevare.
– Det er viktig for oss å vera synlege i lokalsamfunnet. Og så er det kjekt å visa at me kan lyfta i flokk, seier ho.
Direkte på nett
Dei som ikkje vil eller kan ta turen til Kabuso, kan følgja debatten direkte på nettsidene til HF. Debatten vert tilgjengeleg som opptak i ettertid.
Også for fire år sidan freista HF strøyma debatten. Problem med lyden gjorde at det ikkje vart vellukka for delar av sendinga.
– Kva har de gjort for at det skal gå betre i år?
– Me kjøper lydtenester av Kabuso. Og sidan den gongen har me hatt fire år på å skjerpa oss. Me har investert i betre utstyr og har fått meir erfaring med denne typen sendingar. Dessutan fekk me ei nyttig gjenoppfrisking og ein generalprøve då me strøymde debatten i Fossehuset tysdag. Utstyret har me kjøpt med støtte frå kraftfondet i Kvam. I det ligg ei usagd forplikting til å bruka utstyret til allmennyttige føremål.
Når kunsthuset er fullt, vert døra lukka. Dei som ikkje får plass, må eventuelt snu og sjå debatten digitalt. Linga er usikker på kor stor interessa vil vera.
– Eg anar ikkje om det kjem 20 eller 160 personar. For fire år sidan var det fullt hus i Holmatun, men den gongen var det fleire aktuelle, splittande saker – til dømes Kvamsøy-saka – enn det er no. For tida er det ganske fredeleg i lokalpolitikken, og det er kanskje strid som trekkjer folk, seier han.
