– Håpar på drift av skisenter

Etter at det vart opna konkurs då Visitfonna AS melde oppbod 25. november, har det rådd uvisse om framtida til den desidert kraftigaste reiselivsmotoren i Jondal, Fonna Glacier Ski Resort.

23. januar var det skiftesamling i Visitfonna og dotterselskapet Folgefonna Velkomstsenter AS i Hordaland tingrett. Sistnemnde har leigt ut velkomstsenteret frå 2020, med mellom anna restaurant, kiosk, skiutleige og møterom, til morselskapet.

Bustyrar Tonje Tvilde opplyser i dei førebelse meldingane til tingretten og kreditorane at krava i dei to bua til Visitfonna AS og dotterselskapet Folgefonna Velkomstsenter samla lyder på vel 43 millionar kroner. Bustyraren har registrert 61 krav berre i Visitfonna, der krava summerer seg til 29,6 millionar kroner. I Folgefonna Velkomstsenter sitt bu ligg tre krav på totalt 13,6 millionar kroner. Dei to største kreditorane i båe selskap er Innovasjon Noreg og Sparebanken Vest.

Bustyraren skriv at det kan verta aktuelt å selja alt som høyrer til sommarskisenteret, medrekna velkomstsenteret, og at det finst fleire interessentar. Ifylgje Bergens Tidende skal det vera snakk om to aktuelle kjøparar av senteret.

– Dårleg stand

Bustyraren opplyser i den eine meldinga at skianlegget er i helst dårleg stand og treng ny skiheis. Særleg sist sommar vart trongen for sistnemnde prekær. Det er vanskeleg å skaffa reservedelar til det gamle anlegget.

Anleggsmaskinene er elles prega av rust som fylgje av flittig salting i skianlegget. Området med is og snø ved påstiginga til heisen har krympa, og ein fjellrygg i nedfarten har ført til vanskar.

Visitfonna har hatt store underskot sidan 2018. Til dømes var det negative resultatet på 8,7 millionar kroner i 2023. Det er uvisst nett når eigenkapitalen var borte, men det kan ha skjedd i april i fjor. Samstundes vart aksjekapitalen styrkt med om lag 2,4 millionar kroner, noko som kan ha gjeve positiv eigenkapital.

– Ein set sin lit til sommardrifta, men når så snøen smeltar bort tidlegare enn venta, vil resultatet nødvendigvis bli dårleg, skriv Tvilde.

Nyleg investering

Så seint som i fjor investerte Visitfonna over fire millionar kroner i snøkanonar frå Innosnow AS for å laga snø og såleis kjempa mot naturen. Mellom anna eit lån frå Meteva AS, eit eigarselskap ått av Trond Mohn, gjorde kjøpet mogeleg. Selskapet styrkte i 2023 eigenkapitalen med 6,5 millionar kroner.

Bustyraren set spørjeteikn ved den bokførte verdien av anleggsmidlane, som var på åtte millionar kroner ved utgangen av 2023. Til dømes har trakkemaskina vorte oppført med altfor høg verdi, meiner Tvilde. Ho treng å studera rekneskapsføringa nærare for å slå fast om styret har vist naudsynt aktsemd.

– Per i dag ser det mest ut til at det er vêr med meir og uheldige omstende kring dette over fleire år som har gjeve nådestøyten til selskapet, skriv Tvilde.

Då det vart opna konkurs, hadde selskapet fire fast tilsette. Om lag 40 sesongarbeidarar hadde feriepengar frå 2024 til gode.

Folgefonna Velkomstsenter hadde ikkje tilsette då selskapet velta som fylgje av manglande leigeinntekter frå eigaren. Velkomstsenteret vart i haust oppført med ein rekneskapsmessig verdi på vel 15 millionar kroner.

Bustyraren meiner at marknadsverdien av velkomstsenteret er avgrensa av plasseringa – det ligg høgt til fjells og er utan vegtilkome om vinteren – og av dei snevre bruksmogelegskapane. Ein brakkerigg som ligg attmed bygget og vart nytta under bygginga, er skadd av mellom anna fukt og rote og vurdert som verdilaus, meiner Tvilde.

Politisk orienterte

Ullensvang kommune har ifylgje meldinga frå bustyraren fleire interesser i området der skisenteret ligg. Vegen til senteret er kommunal. Dessutan vart det aktuelle området, gard nummer 338/1, i si tid festa bort av Jondal kommune. Skisenteret fekk dessutan heimel til såkalla framfeste. Verdien av denne heimelen er det vanskeleg å fastsetja, ifylgje meldingane frå Tvilde.

Ordførar Roald Aga Haug (Ap) opplyser at han har teke initiativ til møte om saka, med von om få senteret i drift komande sommar, ifylgje Hardanger Folkeblad.

Direktør Andreas Skogseth i Visit Hardangerfjord AS orienterte formannskapsmedlemene om mellom anna skisenteret. Han sa det har vore stor møteaktivitet for å finna ut kva som kan gjerast og kva rolle kommunen kan ha. Vona er å finna ei kortsiktig løysing, parallelt med at det vert arbeidd med ei meir langsiktig løysing.

Ifylgje hans reknestykke kan Folgefonna trekkja til seg turistar som står for 125.000 kommersielle overnattingar i året. Særleg for Jondal og Herand er senteret viktig, sa han.