Håpar på deling av kostnad
Elevrådet og foreldrearbeidsutvalet ved Jondal skule vonar at kommunen vil betala halve kostnaden med den årvisse skuleturen for 10.-klassingar til Auschwitz–Birkenau i Polen.
Ein del av resten av summen skal skaffast gjennom inntektsbringande aktivitet i Ungt entreprenørskap, pluss at foreldre og elevar kan måtta arbeida litt for å samla inn pengar.
Ifylgje referatet frå eit møte i samarbeidsutvalet 1. oktober vil ei løysing med delt finansiering halda liv i ymse aktivitetar og elevkveldar som skapar inntekter. Det vil vera eit gode å få sett dei faste aktivitetane i system, heiter det.
Frå foreldra kom få innspel, anna enn spørsmål om det kan finnast eit skuleturalternativ i Noreg. Ifylgje referatet meiner foreldre, elevar og tilsette at konsentrasjonsleirane i Polen er eit aktuelt og relevant reisemål.
Det var Gard A. Folkvord (Ap) som i førre kommunestyreperiode tok initiativ til å innføra skuleturen. Då eit framlegg med alternative former for finansiering vart drøfta av kommunestyret i juni, vart saka send i retur til rådmannen. Han fekk ordre om å ta saka opp med utvala på skulane før ho vert fremja på nytt.
Les også:
