Håpar på avklaringar før sommaren
Helse i Hardanger AS treng raske pengar medan føretaket held fram innsatsen for permanent finansiering.
I haust løyvde politikarane i Kvam tre millionar kroner til helseprosjektet i Øystese, men fleire folkevalde etterlyste innsats for å endra systemet som har gjort det vanskeleg å skaffa verksemda faste inntekter.
Den innsatsen går no føre seg for fullt, skal ein tru ein søknad til Kvam herad om utbetaling av ein av dei tre millionane.
– Me forventar at varig finansiering og drift er avklara innan sommaren. Me har fleire aktuelle finansieringsløysingar me jobbar med, og alle kan kombinerast etter behov, skriv føretaket.
Ifylgje søknaden vert det arbeidd med offentleg forvalting, politikarar og private aktørar for å kunna tilby den konsentrerte behandlinga. Samstundes vert ein søknad om hjelp frå Trond Mohn Stiftelsen skriven.
NRK Vestland skriv at covid-19-behandlinga hjå Helse i Hardanger er mellombels stogga på grunn av pengemangel i Helse Bergen.
– Me har vore med på reisa, og det er utvikla spanande tenester som sannsynleg kan bety noko for framtida, men me har ikkje økonomi til dette prosjektet no, seier administrerande direktør Eivind Hansen i Helse Bergen til NRK.
