Håpar at merknad skal berga Helse i Hardanger

Dørene i tredje etasje i Hardangerbadet har vore stengde dei siste månadene. Ei viktig årsak er at det regionale helseføretaket Helse Vest valde å kjøpa rehabiliteringstenester frå andre aktørar. Føretaket og støttespelarar har fremja krass kritikk mot avgjerda.

I kulissane har mange sidan arbeidd hardt for å redda helsesatsinga i Øystese. Måndag 27. mai var kvinnhering og stortingsrepresentant Hans Inge Myrvold (Sp) i Kvam for å drøfta mellom anna HH med lokale politikarar og andre interesserte.

Utkast til oppmoding

Myrvold gjorde det klart at han er overtydd om at dei konsentrerte behandlingsformene som HH tilbyr, er både effektive og rimelege.

– Når Helse Vest av ulike grunnar har takka nei til tilbodet til HH, er det vår jobb som politikarar å finna ein annan farbar veg, sa han.

Ein mogleg veg er å overtala Helse Vest til å kjøpa tenester av HH. Problemet er at helseføretaka er sjølvstendige. Staten kan ikkje utan vidare diktera kva dei skal gjera. Staten kan likevel koma med oppmodingar. Det er ein merknad med ei oppmoding om at HH må reddast politikarar i Kvam ønskjer å få inn i revidert nasjonalbudsjett.

Regionråd tek til orde for Helse i Hardanger

Då forslaget til revidert nasjonalbudsjett vart lagt fram 14. mai, var ikkje HH omtala med eit einaste ord, men endringar kan koma før budsjettet vert vedteke av Stortinget. Det skjer truleg 21. juni.

Har laga teksten

Etter møtet på fartøyvernsenteret vart eit utkast til merknad sendt til finanskomiteen, helse- og omsorgskomiteen, hordalandsbenken og Sogn og Fjordane-benken. Utkastet vart sendt av Kvam Næringsråd, som deltok i møtet med Myrvold, og var signert av alle dei politiske partia i Kvam.

Håpet er at nok politisk press skal gjera at komiteane sørgjer for at ein versjon av merknaden finn vegen inn i det revidert nasjonalbudsjett.

I utkastet står det mellom anna at HH har tilført helsetenestene i Noreg ei ny fagleg tilnærming som har synt oppsiktsvekkjande gode resultat, og at komiteen difor ber regjeringa om å leggja til rette for at arbeidet i HH kan halda fram.

– Her stemmer ikkje liv og lære

Hjelp frå Riksrevisjonen?

Dei som kjempar for HH, håpar å få litt draghjelp frå Riksrevisjonen. I februar leverte revisjonen ein rapport om rehabiliteringstenestene i Noreg. I rapporten står mellom anna at lite har skjedd sidan 2012, og at det er kritikkverdig at ikkje Helse- og omsorgsdepartementet har gjennomført tiltak som sørgjer for at pasientar får dei rehabiliteringstenestene dei treng.

Stortinget stilte seg samrøystes bak konklusjonen til revisjonen då den vart handsama 23. mai.

– Me må gjera verdien av HH synleg, slik at statsråden kan trykkja på dei rette knappane i styringsdialogen med Helse Vest. Det å redusera helsekøane vert prioritert høgt av helse- og omsorgsminister Jan Christian Vestre. HH kan vera ei handsrekking, seier Myrvold.

– Kor realistisk er det at HH skal overleva?

– Eg er meir optimistisk no enn eg var i vinter. Det kan ha med årstida å gjera, men det har mest truleg med utviklinga i saka å gjera.