Håpar å nå nye seniorar
Kan frivillig innsats for andre vera eit godt alternativ til bingo og kryssord i livshausten?
– Dei frivillige som har halde på i årevis, vert eldre og har ikkje same kapasitet som før, seier vikarierande frivilligkoordinator Grethe Galtung Johannesen i Grannehjelpa.
Ho påpeikar at samstundes som dagens frivillige vert eldre, kjem det nye pensjonistar til i den andre enden. Nokre av dei er tilflyttarar. Johannesen er sjølv ein av dei, sjølv om ho vel å merka har teke på seg vikariatet. Ho vonar fleire vil vurdera om det kan gagna både dei sjølve og andre å engasjera seg i frivillig innsats.
Presenterer seg
26. januar skipar frivilligsentralen i Kvam til frivilligfest hjå Berge Gard & Gartneri i Tørvikbygd. Johannesen meiner det er eit ypparleg høve til å gjera seg kjend med både tilboda til Grannehjelpa og mogelegheitene for å engasjera seg gjennom organisasjonen.
På frivilligfesten skal ikkje berre eldsjelprisen – Grannehjelpa har fått ei rekkje framlegg om kandidatar – delast ut. Sentralen vil i same slengen nytta høvet til å presentera floraen av aktivitetar.
– Det finst eit hav av tilbod. Ein treng ikkje kjeda seg i Kvam. Og om ein ikkje vil vera frivillig sjølv, kan ein vera med på nokre av aktivitetane. Me får stønad til å få folk, og spesielt seniorar, ut av einsemd og isolasjon. Frivilligfesten vil vera eit godt høve til å visa kva me står for, seier koordinatoren.
Ho påpeikar at det finst mange gode døme på at høg alder ikkje må innebera at ein legg inn årane.
– Ein kan vera aktiv og bidra sjølv om ein brukar gåstol, seier ho.
Får noko att
Ho påpeikar at mange av dei som stiller opp for andre, får fellesskap og sosial kontakt i retur.
– Den sosiale biten er viktig. Innsatsen kan gje like mykje att til dei frivillige som til dei som får hjelp. Ein samhandlar og har det kjekt i lag, seier ho.
Det vert servert både middag, dessert og kulturinnslag på festen. Donasjonar og pengar til overs i Grannehjelpa finansierer gildet.
– Eg håpar folk vågar seg ut og melder seg på, seier Johannesen.
Det siste tilskotet på Grannehjelpa-treet er Aktivitetsmøteplassen, eit statleg støtta tiltak som kjem i sving komande måndag. Ymse arrangørar og anleggseigarar skal presentera fritids- og aktivitetstilbod. Fyrst i rekkja er Hardanger Bordtennisklubb. Målet er å få langtidssjukmelde, rusavhengige, eldre og psykisk sjuke ut av einsemd.
