Håpar å lokka fleire

I haust skal heradsstyret ta stilling til kor mykje det vil auka det kommunale tilskotet til drifta for å motverka at badeanlegget går konkurs. Besøkstala er nemleg langt frå det initiativtakarane stipulerte i budsjetta. Det kan difor liggja an til ei fleirdobling av den opphavleg vedtekne ytinga frå Kvam herad.

Parallelt med denne prosessen søkjer badeanlegget i Øystese om ny stønad frå det kommunale kraftfondet til mellom anna marknadsføring, utstyr og kompetanseheving. Vona er at ein sum på 310.000 – heile kostnaden med den skisserte satsinga – skal bidra til å lokka fleire gjester.

Meir konkret vil søkjaren fornya delar av hinderløypa i bassenget, kjøpa andre leiker og investera i diskolys. I tillegg er vona å skipa til ein sommarleir for born i ferien neste år, noko som føreset kursing av tilsette.

Når det gjeld marknadsføring, er planen å betala for både ein annonsekampanje i lokalaviser og redaksjonell omtale, å setja opp skilt og plakatar, å styrkja den digitale profilen og å laga ein brosjyre.

Badeanlegget har tidlegare fått stønad frå kraftfondet til både marknadsføring og investeringar.