Håpar å få fleire medelevar
Elevrådet håpar elevane frå ein eventuelt nedlagd Tørvikbygd skule kjem til Strandebarm skule.
Det går fram av ei fråsegn i nedleggingssaka som var på høyring til 20. januar.
Rådet påpeikar at Strandebarm skule i motsetnad til Norheimsund skule har god plass til fleire elevar. Fleire elevar vil styrkja det psykososiale miljøet og det faglege samarbeidet, og gje fleire mogelegheiter for samarbeid og fellesskap. Elevar i Tørvikbygd kan oppleva overgangen til Strandebarm som meir naturleg og positiv enn om dei vert flytta til ein mykje større skule, heiter det i innspelet.
– Elevane i Tørvikbygd og Strandebarm har ofte kjennskap til kvarandre gjennom fritidsaktivitetar og felles kjennskap. Dette gjer det lettare å byggja venskap og gjera overgangen mindre krevjande. Ei slik løysing vil bidra til å styrkja samhaldet mellom bygdene, skriv rådet.
Dei unge understrekar det positive med at elevane får på gå same skule i ti år. Det gjev stabilitet, føreseielege forhold og grunnlag for langsiktige relasjonar, meiner dei.
– Sidan elevane frå Tørvikbygd allereie kjem til Strandebarm for å gjennomføra ungdomsskuleåra, meiner me at det er ein fordel at dei byrjar her tidlegare i skuleløpet, skriv elevrådet.
