Håpar å få enøk-tilskot
Asbjørn Eide Snikkarverkstad har søkt kraftfondet i Kvam herad om 70.000 kroner til energisparande tiltak.
Produksjonslokalet ligg i Tørvikbygd. Eide planlegg å installera eit flisfyringsanlegg for å utnytta restprodukta frå produksjonen. Dette er fornuftig ut frå eit miljøperspektiv, skriv han i søknaden.
Enkeltpersonføretaket lagar innreiingar og møblar. Snikkaren turkar materialane inne, noko som er energikrevjande. Det er avgjerande i dagens straummarknad å få gjort noko med dette, då marginane forsvinn delvis eller heilt dersom ein må varma opp lokala med straum, skriv Eide.
Den største kostnaden i prosjektet er deponering av gamalt utstyr, til 39.000 kroner. Montering og igangkøyring av nytt utstyr vil kosta 30.000 kroner, medan sjølve flisfyren vil kosta 25.000 kroner. Samla kostnad er rekna til 140.000 kroner. Eide reknar med 70.000 kroner i eigeninnsats.
