Håpar å byrja saga i mars
Bjarne Guntveit fekk løyve til å byggja sag og lagerhall i Jondal i august i fjor. Arbeidet er godt i gang.
Arbeidet med lagerhallen byrja i september i fjor, og hallen har hatt tett tak i eit år. Bygget som skal hysa saga, håpar Guntveit å reisa i løpet av vinteren, slik at sagbruket er klart til mars eller april.
Sagverket ligg sør for Folgefonnvegen, mellom Jondal og Byrkjeland.
– Eg merkar at det er litt interesse for dette. Folk stikk innom for å forhøyra seg om kva som skjer. Eg trur mange tykkjer det er kjekt å få eit sagbruk med drift heile året i Jondal, seier Guntveit.
Planen er å kjøpa tømmer og selja materialar. Han vil også tilby leigesaging for dei som treng det.
Guntveit har saga med bandsag på hobbybasis i mange år. I det nye sagbruket er planen å installera ei stor sirkelsag.
– Med ei sirkelsag vil eg kunna produsera enklare og meir effektivt, seier han.
Han seier saga først og fremst er meint å gje ei ekstrainntekt.
– Men etterspurnaden er stor nok, går det kanskje an å leva av dette i framtida, seier han.
