Han peika ut rett syndar

Namnet på vinnaren er Johnny Torvald Eiken, som held til på Byrkjeland. Han lukkast ikkje berre med å peika ut rett syndar i kriminalmysteriet, men serverte ei solid grunngjeving attåt.

For å utløysa den grenselause spaninga fyrst som sist: Det var ordførar Ronald Maga Laug som sprengde vinkjellaren til eigaren av Hardanger House, Klodrik Jensen.

Motiv kan Laug ha hatt fleire av, utan at det provar noko. Det avgjerande i årets påskekrim, eit prov som truleg ikkje hadde stått seg åleine i retten, var at Haug snakka usant då han vart teken i noko så sjeldsynt som ein fartskontroll på Belsnes. Han fortalde nemleg politiet at han hadde vore på Hardanger House for å snakka med Klodrik Jensen, medan det tidleg i historia kjem fram at samtalen mellom dei to gjekk føre seg på telefon.

Gløymde pus

Vinnaren fortel at han fekk ei kjensle av det var noko muffens på dette punktet, men at han måtte lesa gjennom to gonger for å finna nøkkelen til gåta.

– Det var ei fin og artig historie, seier Eiken, som har sendt inn løysingar på «mjølkekartongkrimmen» nokre gonger utan å vinna.

Jondølingen var ein av fleire som sende ei utførleg grunngjeving av mistankane sine til HF. Eiken påpeikar at motivet til Laug truleg var at Jondal kunne få meir merksemd enn Odda på grunn av den tillyste Netflix-serien. Ved å ringja til Klodrik Jensen visste han at han var på kontoret medan han planta sprengstoffet i vinkjellaren. Laug hadde ingen grunn til å vera i Jondal denne dagen, ettersom lite og ingenting skjer i Jondal på denne tida, forklarar Eiken.

Han fortel at han seinare kom på at han gløymde eitt litt festleg poeng i forklaringa si.

– Eg skulle ha teke med at ordføraren har med Lothepus å gjera, og at han sikkert har fått innføring i bruk av sprengstoff, seier Eiken.

Glad for deltakinga

HF fekk ei rekkje krimsvar, og om lag like mange frå Jondal som frå Kvam. Det reknar dagleg leiar Kjellaug Camilla Skaar Ljones kan skuldast at handlinga og persongalleriet var plassert i og inspirert av Jondal.

Ho opplyser at ho har fått tilbakemeldingar om at krimhistoria vart ein såkalla snakkis i påsken, ikkje minst i Jondal.

– Det er veldig kjekt at me har lukkast med å engasjera så mange, seier ho.

Fleire av dei som deltok, svara feil. Fleirtalet peika ut rett syndar, men ikkje alle grunngav det med telefonløgna til Laug. Det tek Ljones som eit teikn på at vanskegrada kan ha vore passeleg.

Aviseigaren seier at det var på hengande håret at HF rakk å få med ei krimforteljing i årets påskeavis, noko som diverre medførte eit par tilfelle av namneslurv i historia. Vona er å ha ei hakket meir forseggjord gåte klar til påsken 2025.

– Det er i alle fall målet. Så får me sjå kva me får til, seier ho.