Han kan verta dagleg leiar og styreleiar i Kvammabadet

Helland vart samrøystes tilrådd som ny styreleiar i Kvammabadet KF eit møte i valnemnda onsdag ettermiddag. Heradsstyret avgjer saka 9. desember.

Tanken er at Helland, i tillegg til å avløysa dagens styreleiar Bjørn Frode Skaar, kan overta jobben til dagleg leiar Bjarte Rasmussen. Han ynskjer avløysing. Tilsetjinga må i praksis gjerast av det nye styret, som har makt til å tilsetja.

Voks opp lokalt

Helland, som budde i Norheimsund då han var ung, er utdanna siviløkonomom, revisor og rekneskapsførar, og har arbeidd i mange år med revisjon og rekneskap. Han har hatt ei rekkje styreverv. Mellom anna var han den fyrste styreleiaren i Kvam Kraftverk AS.

Helland får berre to styrelemer med seg, ettersom vedtektene vart endra i sommar slik at styret vart redusert frå fem til tre personar. Tilrådd nestleiar er Reidun Skålheim Solberg, som har vore med i styret fram til no. Ho er økonom og tilsett i Sparebanken Vest.

Den tredje kandidaten er John Audun Jensen, som har handverksutdanning i fleire fag og tidlegare har vore næringsdrivande i Kvam i mange år. Han arbeider med forvalting av bygg i Statens vegvesen.

Marie Steine er innstilt som varalem, ein posisjon ho har frå før. Ho er utdanna byggingeniør og økonom, og er tilsett i Norconsult AS.

Ikkje for eller mot

Nygård sa at han har lagt vinn på å finna kandidatar som har god legitimitet hjå innbyggjarane i Kvam, og som ikkje har vore veldig mot eller veldig for den omstridde kommunale deltakinga i Hardangerbadet.

— Det trur eg er viktig for det vidare arbeidet til styret, sa Nygård, som ikkje stakk under stol at folk ikkje har stått i kø for å få plass i styret.

Lemene i valnemnda rosa kandidatura. Fleire påpeika at det er bra at styrearbeidet får kontinuitet gjennom at Solberg held fram.

— Ein bra bukett, sa Håvard Gjerde (R) om kandidatane.

Mindre utgifter

Den samla godtgjersla til styret i Kvammabadet skal reduserast, i tråd med tidlegare gjevne politiske føringar. Rammene vart fyrst drøfta av valnemnda 17. november. Då Skaar vart vald i 2018, fekk han 122.000 kroner i godtgjersle. Nestleiaren fekk 63.000.

Onsdag rådde nemnda til å gje den nye styreleiaren 80.000 kroner. Vert Helland i tillegg dagleg leiar, kan han få inntil 70.000 kroner til og totalt 150.000 kroner. Nestleiaren får 40.000 kroner og den siste lemen 25.000 kroner, ifylgje framlegget. På toppen kjem, som før, ei godtgjersle per styremøte på 3.000 kroner.

Ifylgje Nygård, som er varaordførar og leiar i valnemnda, har det vore krevjande å få avklara kor mykje arbeid rollene i føretaket krev. Dermed har det òg vore vanskeleg å kunna gje eit rett bilete av oppgåvene til aktuelle kandidatar.

Nygård opplyser at dagleg leiar i dag normalt arbeider 50—70 timar for føretaket på eitt år, men at det føreset at alt går glatt. I år reknar han med å fakturera Kvam herad om lag 130.000 kroner. Når økonomien er kompleks og det vert trong for mykje dialog mellom føretaket, Hardangerbadet AS og Kvam herad, krevst meir arbeid. Slik har det vore både i år og i fjor.

Samla har styreleiaren og dagleg leiar i føretaket kosta heradet 250.000 kroner. Såleis ligg det an til at summen kan minka med kring 100.000.

Ottar Randa (H) meiner godtgjersla har vore romsleg. Han viste til at nestleiaren har fått meir enn heile styret i Kvam Bustadstifting er tilgodesett med.

— Skal vera offentleg

Kvammabadet KF forvaltar interessene til Kvam herad i drifta av Hardangerbadet, der heradet eig og leiger ut eigedom til Hardangerbadet AS. Nygård påpeika at styret har gått over frå ein fase med bygging til ein fase med rein drift.

Det offentlege føretaket er underlagt mellom anna offentleglova, noko som inneber at dokumenta skal vera tilgjengelege for ålmenta. Føretaket har ved fleire høve unnlate å journalføra korrespondanse med Hardangerbadet AS til rett tid. Innkallingar og sakspapir til styremøta, som skal vera opne for ålmenta, har kome seinare enn det vedtektene tilseier, og møta har ikkje vore kunngjorde nokon stad.

Nygård sa at han har gjort det klart for styrekandidatane at dei vert del av eit offentleg føretak som skal vera gjennomsiktig og retta seg etter reglar som sikrar ålmenta innsyn. Elles oppstår det fort støy og spekulasjonar, påpeika han.

— Badet har hatt ein trong fødsel. Det er utruleg viktig at ein har eit styre som skapar tillit, er transparent og ope, sa Kari Mostad (MDG).

Jostein Ljones (Sp) meiner ein må sjå gjennom fingrane med at det offentlege føretaket ikkje har vore så ope som det etter lover og reglar skal vera. Han meiner styret og dagleg leiar skal ha ros for å ha gjort ein stor jobb.