Han er klar for tv-aksjonen
Sundag kjem bøsseberarane på døra di. Ordføraren vil gjerne ha fleire med på laget.
I snitt kvart tredje sekund skal ei jente verta gifta bort ein eller annan stad i verda. Pengane frå årets tv-aksjon skal gå til kampen mot barneekteskap og dermed for å gje jentene mogelegheita til å velja eiga framtid ved å gå på skule og læra om rettane dei har.
«Barn, ikkje brud» er aksjonsslagordet som prydar dei blå aksjonsskjortene. Mellom tiltaka er opplæring og informasjon, utdanningsstønad og bygging av eigne jentetoalett.
– Avhengige av menn
Innsatsen til Plan International, som er årets mottakar av pengane som vert samla inn, er størst der barneekteskap er mest utbreidd: Niger, Mali, Malawi, Nepal og Bangladesh.
— Dette kan vera veldig traumatiserande for jenter som vert utsette for det. Ekteskapa sementerer ein samfunnsorden der dei er heilt avhengige av mennene. Og så får ein ikkje utnytta hjernekapasiteten til halve befolkninga, seier ordførar Torgeir Næss i Kvam herad.
Han har ikkje personleg røynsle med barneekteskap, men kjenner til problemstillinga som samfunnsinteressert borgar. Interessert er Næss, som leier aksjonskomiteen i Kvam, også i at flest mogeleg skal stilla opp som bøsseberarar 24. oktober.
Håpar på draghjelp
Kvam herad koordinerer og organiserer innsamlinga, medan det er grendeutvala som står for det praktiske arbeidet med å gå frå dør til dør. I somme område har det vore utfordringar med å få mange nok frivillige, fortel Næss. Til dømes steppar ungdomsrådet inn for å hjelpa til i Øystese.
Ei anna utfordring er at mange, som ordføraren sjølv, ikkje lenger har kontantar i lomma eller heimen. Det finst gode digitale alternativ for å bidra, forsikrar han.
Fredag kjem han sjølv til å ringja til ein del lokale aktørar i næringslivet for å oppmoda dei om å delta i dugnaden. Dessutan har han oppretta ei såkalla digital bøsse på nettet for å få vener og kjende til å bidra.
