Hamnestriden held fram

Denne månaden er det eit år sidan Hordaland tingrett avsa dom i tvistesaka. Tingretten påla båtlaget å fjerna og flytta delar av anlegget. Båtlaget vart dessutan dømt til å betala 800.000 kroner i sakskostnader. Tingretten meinte at strand- eller båtfesterettane til dei ni partane var vesentleg krenkte.

Korleis Gulating lagmannsrett vil vurdera saka, står att å sjå. Tørvikbygd Båtlag meinte to dagar burde halda i lagmannsretten. Saksøkjarane meinte det vart for kort tid og ville ha fire dagar til hovudforhandlingane. Slik vart det, syner berammingslista til retten.

Kritisk til domen

Tørvikbygd båtlag anka heile domen frå tingretten i fjor vår. Båtlaget krev prinsipalt frifinning og subsidiært at inngrepet i hamna vert mindre enn domen tilseier. Båtlaget ankar i tillegg avgjerda om å betala 800.000 i sakskostnader for motpartane.

I ankeerklæringa hevdar advokat Nils E. Tangedal i Advokatfirmaet Judicium DA at det er avgjerande feil i bevisvurderinga og rettsbruken, og at det gjort saksbehandlingsfeil.

Ifylgje anken meiner båtlaget at det unødvendig store omfanget av saka viser att i fleire uklare punkt og sjølvmotseiingar i domen. Som døme hevdar båtlaget at utfyllingsretten vert blanda med tilflotsretten, og at verknaden av reguleringsplanen er misforstått.

Båtlaget meiner dessutan at tingretten legg til grunn urealistiske oppfatningar om kva storleik ein kan rekna med på framtidige båtar, «uten å se at tingrettens syn på dette bokstavelig talt kolliderer med seg selv».

– Er det dukka opp nye moment i saka sidan ho vart handsama i tingretten?

– Det er ikkje mykje av faktiske forhold eller spørsmål i saka som er omtvista. Vedteken reguleringsplan er eit faktum, og dei fysiske forholda og avstandane og så vidare i hamna er eit anna. Nye moment i saka er det dermed lite av, seier Tangedal.

– Kva trur du er det viktigaste denne rettsaka vil dreia seg om?

– Det vert nok i betydeleg utstrekning dei same forhold og spørsmål som i tingretten, moglegvis frå andre synsvinklar. For båtlaget er det viktig å få overprøvt tingretten sin dom og dei vurderingane som er gjort i domen, som båtlaget er ueinig i, seier Tangedal.

Les også:

– Relativt sikker

Advokat Bernt Jakob Pettersen i BJP Advokat AS fører saka for saksøkjarane, som er ei rekkje grunneigarar i Skutevik. Han ynskjer i utgangspunktet ikkje anken fremja for retten. Den subsidiære påstanden er at båtlaget må flytta hamna slik at ingen del av henne ligg nærare land enn 45 meter ved middels vasstand.

Advokaten skriv i anketilsvaret at saka vart svært godt opplyst for tingretten. Domen på 35 sider meiner han er grundig og drøftar alle påstandsgrunnlag og argument som kom fram i tingretten.

Han avviser på punkt etter punkt påstandane frå båtlaget i anken.

– Kjernen i saka er kor mykje plass som må til for sikker manøvrering til og frå fortøyingsbøyene på grunneigarane sin eigedom, seier Pettersen til HF.

Vidare opplyser advokaten at han reknar det som relativt sikkert at tingretten si avgjerd vil verta ståande, og meiner det er gode moglegheiter for at endå større delar av båthamna må fjernast.

Les også: