Hamnekapasitet kan auka med 36 prosent

Planen til båtlaget er å utvida anlegget med to om lag åtti meter lange betongbryggjer. Den eine der bølgjebrytaren står i dag, og den andre utom denne igjen. Ytst skal dagens bølgjebrytar liggja. Det er også planlagt gangbru mellom dei nye bryggjene.

Prisen er venta å liggja på mellom fem og sju millionar kroner.

Båtlaget søkte Kvam herad om ei utviding i 2010. Den gongen var det mellom anna planar om ein molo, med bruk av massar frå Børvenestunnelen. Kvam herad gav båtlaget avslag og kravde reguleringsplan.

– Me er mykje betre skodde no, seier leiar Nils-Ove Kvittingen i båtlaget.

– Vil vera nyttig

Ei av bryggjene og bølgjedemparen føreset dispensasjon frå kravet om reguleringsplan. I juli sende båtlaget ut nabovarsel. I desse dagar vert dispensasjonssøknaden send til Kvam herad, ifølgje Kjetil Kvittingen i Arkoconsult AS. Selskapet er engasjert av båtlaget til å søkja.

I kommuneplanen som vart vedteken i 2019, er området sett av til framtidig småbåthamn.

Tiltaket vil vera nyttig for lokalsamfunnet ettersom delar av det skal verta gjestebryggjer, eit tilbod bygda vantar i dag. Bryggjene vil skapa meir aktivt båtliv og vera positivt for handelen og turismen i sentrum, meiner båtlaget.

– Så handlar det like mykje om bølgjevern for anlegget. Bølgjedemparen i dag vernar ikkje båthamna godt nok, seier Nils-Ove Kvittingen.

Lang venteliste

Båtplassane vil truleg kosta frå 85.000 kroner, og det er planlagt eit førehandssal på 30 båtplassar før byggjestart. Medlemer som allereie eig båtplass i hamna, skal betala 6.000 kroner kvar til prosjektet.

I fjor haust la båtlaget ut informasjon om planane på nettsida si. Sidan har kring femti personar meldt interesse for båtplass. Dei kjem i tillegg til kring førti medlemer som står på venteliste frå før. Til no har det vore mest pågang etter små båtplassar.

I hamnereglementet på nettsida til båtlaget står det at dei som søkjer om båtplass, må ha fast bustadadresse i Kvam. Det kravet vart ifylgje formannen stroke på førre årsmøte.

Parkering

Ein auke på 42 båtplassar medfører etter kommuneplanen eit minimumskrav om i alt 53 parkeringsplassar. Anlegget har i dag om lag 19.

Kravet vil båtlaget stetta ved å gjera dagens opplagsplass om til parkeringsareal og sikra totalt 54 plassar. I tillegg disponerer båtlaget eit anna område som kan nyttast til parkering, ifølgje søknaden.

Kvam herad er i ferd med å laga ein områdeplan for Øystese. Båtlaget reknar med at planprosessen vil verta kompleks og ta lang tid. Laget meiner at tiltaka i båthamna ikkje er komplekse, og at det ikkje er usannsynleg at planen for området vil vera i tråd med den aktuelle utbygginga. Regulering vil ikkje føra til eit betre avgjerdsgrunnlag, meiner søkjaren.