– Hald fram med Tryglavik-plan!

– Det er ikkje mindre aktuelt på grunn av biogassanlegget. Det er viktig for Jondal og Ullensvang å leggja til rette for næring. Me veit kor lang tid ting tek. Det er for seint når aktørane kjem.

Det sa Elin Eide Brattabø (H) då utval for samfunn, plan og næring drøfta plansaka onsdag. Jondølingen meiner at det ikkje er nokon grunn til å dra i bremsen sjølv om Heygaz Norway, som eig biogasselskapet Renevo AS, ikkje har vist vilje til å bidra til planprosessen.

Så lite respons har kommunen fått at rådmannen har sett seg nøydd til å leggja eit vegval fram for dei folkevalde: Skal planlegginga halda fram utan biogass, slik at ein berre legg til rette eit næringsområde utan definerte føremål?

Ja, meiner utvalet, minus Lisa Karine Haugland (R) og Bente Bjotveit (Sp). Haugland føreslo å leggja planprosessen på is, vurdera bruken av området i kommuneplanen og arbeida vidare med alternative næringsareal. Ho meiner Tryglavik vil vera konfliktfylt med tanke på både natur og friluftsføremål, og at det er understreka i dei faglege rapportane som er offentleggjorde så langt.

– Me må setja ned foten og tenkja oss om, sa ho.

Ottast mangel

Ho fekk moralsk støtte av fleire enn Bjotveit, men dei andre enda likevel med å røysta for framhald. André Botnen (Ap), til dømes, viste til at området vil få høge skjeringar og vert krevjande og kostesamt å opparbeida. Om ikkje ein har store, tunge aktørar, kven skal dekkja kostnadene? undra han.

– Dette er ikkje tilgjengeleg for ein liten entreprenør, for det krev enorme investeringar, sa han, som i tillegg ottast at området kan verta eit nytt rotihop av ein lagerplass.

Botnen ottast dessutan at planen må endrast om han er tilpassa biogassføremål. Jarle Vangen (Ap) sette spørjeteikn ved om arealet må liggja ved fjorden om ingen har signalisert at dei treng kai. Om kaien kan droppast, bør slike område vera meir løynde, meiner han.

–  Det ligg eit steinbrot i nærleiken, men det er ikkje nokon grunn til å laga endå meir ugreie, sa han.

– På tide

Jørund Kvestad (Sp) understreka, til liks med Brattabø, at næringsområdet har vore med i kommuneplanen for Jondal sidan 2012.

– Det er på tide å koma vidare og leggja til rette. Det er ikkje nokon som står i kø, men når dei kjem, må det vera lagt til rette. Natur er ekstremt viktig, men for å få til noko må me ofra noko, sa han.

– Me kan ikkje ha aktørar som snusar på oss, og så har me ikkje areal tilgjengeleg. Det er for seint når dei bankar på døra, sa Vidar Solvi (Ap).

Brattebø minte om at sjølv om området ligg ved fjorden, ligg det nokså skjerma og er heilt ypparleg til næring. Ein ser ikkje området når ein køyrer forbi det, påpeika ho. Dessutan meiner ho at berre nokre få personar nyttar arealet, i alle fall inntil det vart aktuelt med næringsareal der.

Haugland påpeika, til ingen nytte, at det har skjedd mykje på naturfronten sidan 2012. Til dømes at naturavtalen frå 2022 forpliktar kommunane til å ta vare på natur både på land og i sjøen.

– Stort og godt

Sakshandsamar og samfunnsplanleggjar Håvard Reinsnos Apold opplyste at andre næringsaktørar enn biogasselskap vil kunna ta området i bruk utan å endra reguleringsplanen. Om det skulle verta aktuelt med biogassverksemd igjen seinare, kan det regulerast. Han minte elles om at det er mogeleg å gje føringar i reguleringsplanen for bruk av området, til dømes for lagring.

Apold stakk ikkje under kontorstol at området vert krevjande å opparbeida, men slo fast at det vert eit både stort og godt næringsområde knytt til sjøen. Det ligg så langt an til å opna for eit utbygt areal på 30–40 prosent, sa han. Han viste i tillegg fram ei skisse som viser korleis vegstrukturen vil verta.

Skissa er ikkje å finna i saksdokumenta enno, sidan planen berre er levert som utkast så langt. Apold sa at kommunen no har fått nesten ferdige plandokument, og at planprosessen såleis er komen ganske langt og har kosta ein del. Om politikarane vil halda fram, kan saka verta lagd fram for dei rett før eller etter sommaren.

Rådmann Ole-Jørgen Jondahl understreka at det er kommunestyret som skal vedta eventuelle sal av eigedom i området til interessentar.

– Den diskusjonen er litt søkt, for det ligg langt fram i tid, sa han.

Han meiner det sentrale spørsmålet no er om planarbeidet skal halda fram, uavhengig av kva verksemder det kan verta snakk om å sleppa til.

Kommunestyret avgjer saka 19. mars.