Hadde ikkje noko skatteval
Ulike delar av Ullensvang vil få ulik eigedomsskatt i tre år. Politikarane har nemleg ikkje noko val.
Tysdag handsama formannskapet framlegget om å redusera eigedomsskatten for 223 eigedomar i dei tidlegare kommunane Odda og Jondal. Det vart samrøystes tilrådd. Kommunestyret avgjer saka onsdag.
Dei folkevalde har i realiteten ikkje noko val, kom det fram i ordskiftet etter at Erlend Nævdal Bolstad (H) stilte spørsmål om alternativa. Forklaringa er at vedtaket i kommunestyret 18. desember var i strid med føringane for skattlegging ved kommunesamanslåing som Stortinget vedtok to dagar seinare.
– De må endra vedtaket. Det er i strid med eigedomsskattelova i dag, slo advokat Silje Aga Rogan i Advokatfirmaet Lund & Co AS fast.
Frå sju til to
Dei folkevalde vedtok før jul ein skattesats på sju promille for alle næringseigedomane i Ullensvang. Det nye framlegget inneber å skattleggja dei 223 eigedomane som ikkje har vore skattlagde før, med ein sats på berre to promille i år. Så skal satsen auka gradvis til makssatsen sju promille i 2023, då heile kommunen vil ha likt nivå. Endringa medfører eit inntektstap på 3,3 millionar kroner.
Eigedomsskatten er allereie betala, men dei som har lagt ut for mykje, skal få pengane att.
– Dei vil oppleva det som positivt at satsen vert redusert, sa ordførar Roald Aga Haug (Ap).
La seg flat
Fleire ville vita korleis over tre månader kunne gå før administrasjonen oppdaga feilen, som fyrst vart funnen kring påske. Saksutgreiinga med framlegget om å gjera om vedtaket kom sist veke. Rådmann Ole-Jørgen Jondahl la seg flat og orsaka at ein ikkje oppdaga feilen før.
Rogan påpeika at det er sjeldan Stortinget gjer vedtak av denne typen som trer i kraft knapt to veker seinare, og at saka heller ikkje vart send på høyring til kommunane. Departementet var svært seint ute med endringane, som difor kom brått på, påpeika ho.
Ho opplyste at Ullensvang slett ikkje er åleine om å ha hamna i denne situasjonen.
Store summar
Også tidlegare endringar i skattlegginga og reduksjon i skatten vart drøfta av formannskapet, med H og Ap som motpolar i ordskiftet. Det kom fram at dersom dei folkevalde vil redusera skattesatsen for dei næringseigedomane som framleis vert skattlagde med sju promille, må det gjelda også kraftanlegg.
Ein reduksjon til dømes til to promille vil redusera inntektene frå berre kraftanlegga med bortimot 70 millionar kroner, ifølgje Rogan.
– Eg vil tru det får store følgjer for budsjettet, sa ho.
Jondahl minte om at årets budsjett er saldert med 30 millionar kroner frå fond, noko som ein må ta med seg i diskusjonen. Reduserer ein inntektene meir, vil det gjera utfordringa endå større både i år og neste år, påpeika han.
Uvisst kva ein får att
Både Trygve Bolstad (Ap) og Terje Kollbotn (Raudt) tok opp spørsmålet om kva kompensasjon kommunane kan venta seg for tapet overgangsordninga medfører. Bolstad viste til at han har høyrt at ein berre får 55 prosent att.
Administrasjonen var ikkje i stand til å svara på sparket, men økonomisjef Anne Tove Sandal Teigenes stadfesta at ein ikkje kan rekna med full kompensasjon.
