Grova kan få 30-sone i staden for 40-sone

7.–15. juni i år vart farten målt fleire stader i Norheimsund sentrum, som grunnlag for å vurdera kva fartsgrensa skal vera. Det opplyser Daniel Melve Kvarme, fagskuleingeniør for vegforvalting i avdeling for infrastruktur og veg i Vestland fylkeskommune, i ein e-post til HF.

I desember i fjor svara vegvesenet på ei tilråding frå fylkeskommunen. I tilrådinga skriv fylkeskommunen at vegen har forretningar på begge sider og at turismen fører til vesentleg trafikkauke. Vegstrekninga vil få auka trafikk, spesielt i form av mjuke trafikantar, fordi dei vidaregåande skulane skal samlast i Norheimsund sentrum, heiter det i innstillinga.

– Vegstrekninga har høg aktivitet. Det er etter vår vurdering naturleg med ei fartsgrense på 30 kilometer i timen, står det i innstillinga.

– Ikkje grunnlag

Vegvesenet delte ikkje synet til fylkeskommunen. Svaret var at det ikkje er grunnlag for 30-sone, men at det kunne ha vorte innført ei fartsgrense på 40, heiter det i brevet.

Les også:

Vidare skriv vegvesenet at den fysiske utforminga langs hovudvegen i sentrum tilseier at det bør nyttast ei fartsgrense i det lågare sjiktet. Ifylgje vegvesenet er det langsgåande parkeringsplassar i staden for fri ferdsle av mjuke trafikantar langs vegen. Vegvesenet påpeikar at fylkesvegen manglar fortau, slik at mjuke trafikantar ikkje kan gå utanfor vegen langs heile strekkja. Med dagens tilhøve vil det difor vera meir naturleg med 40-grense om fartsgrensa på strekninga skal senkast, skriv vegvesenet.

Om farten vert sett ned, kan det vera trong for tydelegare skilje mellom mjuke trafikantar og parkering, og fleire fartsdempande tiltak, står det i brevet. Vegvesenet opplyser at nokre av dei eksisterande skilta som regulerer stopp og parkering, bør reviderast.

Vegvesenet ynskte dialog med fylkeskommunen om saka, men ingenting er registrert i saka sidan innkallinga til dialogmøtet i januar. Kvarme opplyser at møtet vart gjennomført, og at dei to partane vart einige om å gjennomføra dei nemnde fartsmålingane før dei vurderer fartsgrensa. Målingane skal, ifylgje Kvarme, vurderast i eit nytt møte.

– Flest under grensa

Fylkeskommunen skal gjera grunnarbeidet for å finna ut kva som kan vera rett fartsgrense. Dette vert samla i ei innstilling. Målingane, saman med ei vurdering av det samla trafikkbiletet, vert ein del av innstillinga. Mellom anna skal partane sjå på kor mykje aktivitet det er langs vegen og om born ferdast der, seier Kvarme. Innstillinga skal sendast til vegvesenet, som til slutt skal gjera vedtak om fartsgrensa.

Ifylgje rapportane vart målingane gjorde ved tre gangfelt i sentrum. Kvarme fortel at det vart hengt opp ein boks som måler farten til bilistane. Det fyrste målingspunktet var ved Amigos Pizza og Kebab, det andre ved Mo Sport og det tredje ved Nils Aksnes & Co.

Målingane viste at 2–3 prosent køyrde i over 50 kilometer i timen. Totalt i båe retningar passerte 40.795 køyretøy målepunktet ved Amigos. Ingen av desse køyrde i over 50. Gjennomsnittsfarten var 29 kilometer i timen.

Ved Mo Sport vart farten målt berre i retning mot Straumen. Av dei 13.262 køyretøya som vart registrerte, køyrde 2 prosent over fartsgrensa, og snittet var på 35 kilometer i timen. Begge retningar vart målte ved Nils Aksnes & Co. 3 prosent av dei 35.080 køyretøya som passerte, køyrde for fort. Gjennomsnittsfarten var 36 kilometer.