Grønt og raudt samarbeid
Sp og R har inngått eit valteknisk samarbeid som sikrar sistnemnde formannskapsplass i Ullensvang.
I tillegg til at partia stiller seg bak framlegg om Lajla-Margrethe Lindskog-Lund (Sp) som ordførar og Terje Kollbotn (R) som varaordførar, ynskjer dei å samarbeida meir politisk både med kvarandre og andre parti.
Avtalen mellom partia er datert 11. oktober. Han inneber at Sp og R, som til saman får 14 av 33 representantar i det nye kommunestyret, stiller felles liste til val av formannskap og administrasjonsutval.
Sp får tre representantar og R éin representant i formannskapet. Kvart parti får éin lem i administrasjonsutvalet. I valet av dei to utvala stiller partia med separate lister. Om kraftutvalet held fram og vert utvida til fem lemer, får partia éin representant kvar.
Partia ynskjer ein mest mogeleg open og ryddig prosess fram mot det konstituerande møtet i kommunestyret 18. oktober. Vona deira er at maktfordelinga skal spegla både valresultatet og ulike delar av kommunen, ifylgje avtalen.
Frå før er det kjent at Roald Aga Haug (Ap) held fram som ordførar, medan Inger Synnøve Vestrheim (H) vert varaordførar. Dei får støtte av Ap, H, SV, KrF og INP.
