– Grøn oase kan verta i strid med plan
Øystese Utvikling AS kan også i år få kommunal stønad til Øystesekonferansen.
Rådmannen føreslår i alle høve å gje 20.000 kroner frå kraftfondet til arrangementet 18. november. Også i fjor løyvde heradsstyret pengar til samlinga, som har bakgrunn i eit anna kommunalt støtta prosjekt: den såkalla masterplanen for Øystese.
Søkjaren bad om i alt 70.000 kroner til både konferansen og eit forprosjekt med tittelen «Draumen om Mikkjelsflaten». Samla kostnad er 155.000 kroner.
Sistnemnde bør ikkje heradet støtta, all den tid det kan koma i konflikt med den enno ikkje ferdige områdeplanen for Øystese sentrum.
– Det er risiko for at aktivitetane vil vera uaktuelle dersom områdeplanen legg opp til andre aktivitetar på flaten, skriv rådmannen.
Forprosjektet går ut på å utvikla Mikkjelsflaten til ein grøn oase, i samarbeid med lokale lag og organisasjonar og fagmiljø både i og utanfor Kvam, for å auka attraktiviteten til bygda.
Etter rådmannen si vurdering er søknaden i tråd med fire av fem vide kriterium i kommunedelplanen for næring og kompetanse.
