Grøn bygging av grøn kraft

Det fortel dagleg leiar Knut Endre Øyri. Oppdragsgjevar på Evanger er Eviny AS.

Øyri vil ikkje ut med kor mykje jobben er verd, men det er ein stor jobb for GBS og ein av dei større dei siste fem åra, seier han. 12 mann vil vera sysselsette der i halvtanna år. Arbeidet består av graving, sprenging, støyping og muring – kjerneverksemda til GBS.

Noko av grunnen til at GBS fekk jobben, var eit fokus på berekraft i forhandlingane. Tiltaket skulle vera så klimavenleg som mogleg. I prosjektet skal GBS bruka lågkarbonbetong, gjenbruka massar og knusa massar på staden for å redusera massetransporten. Verksemda skal byggja ein kraftstasjon, tre kilometer med røyrgate og ein demning i Tverrelvi, fortel Øyri.

Det årlege produksjonen vil verta om lag 41 gigawattimar (GWh), som svarar til straumforbruket i 2.500 bustader, heiter det på heimesida til Eviny.

Selskapet investerer 137 millionar kroner i prosjektet. Arbeidet skal vera ferdig hausten 2024. Kraftstasjonen vert plassert om lag fem kilometer aust for Evanger, like ved E16.

Tverrelvi kraftverk vil utnytta eit fall på rundt 300 meter. Aggregatet skal ha peltonturbin og ein effekt på 9,9 megawatt. Utløpet frå kraftstasjonen er plassert ovanfor den lakseførande strekkja for å sikra gode levevilkår for fisken.

GBS startar i tillegg snart med arbeid på kraftverksdammane ved Krokavatn ovanfor Norheimsund. Der skal fem–seks mann arbeida frå mai til november.

– Det er ein god jobb med masse fint arbeid. Det er truleg ein av dei finaste arbeidsplassane i landet, seier Øyri.

Primærdammen skal byggjast på litt, og sekundærdammen skal rivast delvis og støypast på nytt, fortel han.