Grashopper skal gjere oppdrettslaksen sunnare
Oppdrettarnettverket Salmon Group satsar på eit insektmjøl laga av grashopper og sirissar. Målet er at oppdrettslaksen skal få betre helse.
Salmon Group er eit nettverk av oppdrettsselskap langs heile norskekysten. Det er Ålesund-bedrifta Metapod som hadde ideen til mjølet og det er også dei som skal produsere det, skriv NRK.
– Fiskefôret som blir brukt i dag, er i utgangspunktet råvarer som i staden kunne blitt ete av menneske. Det vil vi redusere, seier innkjøpssjef Nils Inge Hitland i Salmon Group til rikskringkastaren.
Artikkelen held fram under annonsen.
Det nye produktet skal vere svært næringsrikt og sunnare for oppdrettslaksen. Det blir ein konkurrent til dei andre hovudkjeldene til protein hos oppdrettslaks, som soya og fiskemjøl.
– Fisken vil få ein diett som er meir lik den fisken har i naturen, seier Hitland.
