Granska arbeidsmiljøet, men fylgde ikkje opp

Det går fram av rapporten frå eit tilsyn med institusjonen 28. mai. Føremålet var å avdekkja om arbeidsgjevaren arbeider systematisk for å hindra at arbeidstakarane får psykiske vanskar og muskel- og skjelettplager.

Tilsynet enda med fleire pålegg. Det eine går ut på å kartleggja og risikovurdera arbeidsmiljøfaktorar som bakgrunn for å leggja planar og forma tiltak, alt i lag med arbeidstakarar og tillitsvalde.

Ifylgje rapporten er dei tilsette nemleg jamleg i situasjonar som kan føra til dei nemnde lidingane, mellom anna på grunn av tidspress, gamle lokale og brukarar med krevjande åtferd. Ei helse-, miljø- og tryggleiksundersøking er ikkje fylgd opp med vurderingar, plan og tiltak, vert det opplyst.

Dei andre pålegga går ut på at arbeidsgjevaren må gje verneombodet naudsynt opplæring, gje leiar for institusjonen opplæring i å kontrollera at arbeidet vert utført på ein trygg måte, og sikra at bedriftshelsetenesta hjelper til med pålegga. Sistnemnde har nemleg vore lite involvert i førebyggjande arbeid, røper rapporten.

Kvam herad hadde ikkje merknader til rapporten innan fristen 8. juli, men bad om å få utsett pålegget om å gje verneombodet opplæring til 29. november. Fristen for å fylgja opp dei andre pålegga er 31. oktober.

Ifylgje rapporten kom det under tilsynet fram at Øysteseheimen har hatt høgt sjukefråvær, utfordringar med arbeidsmiljøet, rekrutteringsvanskar og fleire leiarbyte.

Før tilsynet sende Kvam herad dokumentasjon til Arbeidstilsynet, men denne er ikkje journalført av Kvam herad. HF bad om innsyn i han, men fekk ikkje svar innan fristen på fem arbeidsdagar, og klaga på avslaget 14. juli. Enno har ikkje Kvam herad handsama saka.

Også heradsstyrelem Arne Sandven (H) har bede om innsyn i dokumentasjonen, utan å få svar. Han har sidan vendt seg til Statsforvaltaren for å få fortgang i saka. Sistnemnde har bede Kvam herad handsama innsynssaka i tråd med reglane, så langt utan resultat.