Grannehjelpa treng meir pengar
– Både nasjonalt og kommunalt får me signal om at det frivillige arbeidet vert meir og meir viktig.
Det skriv styreleiar Frode Sandven og dagleg leiar Siriann Lillevik i Grannehjelpa i ein søknad til Kvam herad.
Frivilligsentralen ber heradet om ein auke i driftstilskotet på 280.000 kroner. Det må til for å halda på dagens aktivitetstilbod og for å auka aktivitetstilbod retta mot eldre heimebuande. Kommunar sparar mykje pengar kvart år på alt det frivillige arbeidet som vert gjort i lokalsamfunn, står det i søknaden.
Det er søkt om stønad frå fleire eksterne aktørar til diverse prosjekt, men ofte fylgjer det eit krav om at pengane ikkje skal dekkja løn og drift av prosjekta. Det reduserer moglegheita for å gjennomføra like mange prosjekt som før, skriv Grannehjelpa.
Dei siste åra har talet på fast tilsette vore 1,5 stillingar, i tillegg til tilsette i prosjektstillingar i ulik storleik. I år vart det endra til 1,8 stillingar i fast stilling. Det vart gjort av di ein av dei tilsette over fleire år har gått i høgare stillingsprosent, og no hadde rett på ei høgare fast tilsetjing.
Kvart år søkjer kommunane om og får statleg tilskot til frivilligsentralane. I fjor var tilskotet til Grannehjelpa på 480.000 kroner. I tillegg løyver Kvam herad tilskot til Grannehjelpa gjennom årlege budsjettvedtak. Summen av det kommunale og statlege tilskotet var 1.290.000 kroner i 2024.
Rådmannen skal presentera budsjettframlegget for heradsstyret 14. november.
