Golvet toler ikkje vekta av ny brannbil
Det er konklusjonen til H2 Hardanger etter ei synfaring på Oma brannstasjon.
– Konklusjonen er ikkje opplyftande, skriv Håkon Hjartnes, gruppeleiar for prosjektering i H2 Hardanger AS, til Kvam herad.
H2 Hardanger har kontrollert berekapasiteten i eksisterande bygg på Oma brannstasjon. Bakgrunnen er at Kvam herad bad om å få golvet kontrollert i samband med kjøp av ein ny brannbil. Den nye brannbilen veg 26 tonn, medan den gamle veg 12, skriv Hjartnes.
H2 Hardanger har både sjekka teikningar av betongdekke og bjelkar, og gjennomført ei synfaring i bygget for å kontrollera at konstruksjonane stemmer med teikningane. Det er ikkje registrert noko som tyder på avvik, heiter det i rapporten frå H2 Hardanger.
I rapporten skriv Hjartnes at eksisterande dekke ikkje har kapasitet til vekta av ny brannbil. Tiltak må til før ny bruk kan tillatast, heiter det i rapporten.
