Godkjenner utslepp frå damprosjektet
Statsforvaltaren i Vestland har gjeve Statkraft Energi (SE) løyve til utslepp i samband med oppgradering av dammen ved Bjølsegrøvatnet.
Arbeidet, som etter planen skal utførast i perioden 2025 til 2029, inkluderer bygging av ein ny betongdam, riving av eksisterande dam og bygging av to tunnelar og veg opp frå dagens endestopp ved Langhamrane.
Så lenge avbøtande tiltak vert gjennomførte og anlegget vert drifta i tråd med utsleppstillatinga, vil miljøforholda vera tilfredsstillande, konkluderer Statsforvaltaren.
Anleggsvatn frå tunnelboringa vil innehalda partiklar. Avrenninga av det partikkelhaldige vatnet kan ha negativ effekt mellom anna på fisk. Av avbøtande tiltak lyt vatn frå tunnel- og anleggsarbeid reinsast før det går ut i naturen, for å fjerna stoff som kan skada miljøet. Også restar frå sprenging og bygging, som plast og betong, må samlast opp og handterast på ein forsvarleg måte.
Vidare må alle maskiner ha utstyr tilgjengeleg for raskt å kunna stoppa og fjerna eventuell ureining. I tillegg skal elvar og bekker overvakast.
To innspel
Tre bekkar eller elvar vil verta påverka av arbeidet med tilkomstvegen, ifylgje saksutgreiinga. Det gjeld Bjølvo, som kjem ut i Ytre Ålvik, ein ikkje namngjeven bekk som kjem ned ved Ranaskjer, og Kaldakjelgjeli, som kjem ut i Vikedal.
Då saka var på høyring, kom to innspel: eitt frå Vestland fylkeskommune og eitt frå Nils Eivind Stranden. Sistnemnde skreiv på vegner av hyttestyret ved damhytta.
Fylkeskommunen understreka at søkjaren og energistyresmaktene må vera oppdaterte på regional plan for vassforvalting, og sørgja for at tiltaket ikkje står i vegen for å nå miljømåla i vassdraget.
Dei føreslegne tiltaka bør fylgjast opp med eit overvakingsprogram, skreiv fylkeskommunen. SE er samd. Uttalen er i tråd med intensjonen og vert teken til etterretning, skriv energiselskapet i ein kommentar.
– Uroa for drikkevatnet
Stranden og hyttestyret i damhytta er opptekne av at Bjølvo ikkje må verta ureina, då elva vert nytta som drikkevatn av somme. Dei er òg opptekne av at avrenning frå tunneldeponiet ikkje bør hamna i Ytre Ålvik. Det er fleire private brønnar knytte til Bjølvo, og borehol nedstraums anleggsområdet.
Innspela vart sende også til Noregs vassdrags- og energidirektorat (NVE) då detaljplanen for miljø og landskap var på høyring. SE har ikkje kommentert faren for negativ påverknad i den private drikkevassforsyninga nedstraums anleggsområdet i tilsvara til detaljplanen.
På bakgrunn av innspelet har Statsforvaltaren sett vilkår om å laga ei detaljert risikovurdering av fare for ureining av den private drikkevannsforsyninga, og forslag til avbøtande tiltak. Om det er fare for negativ påverknad av brønnane, skal vatnet i brønnane testast før, under og etter anleggsarbeidet for å dokumentera eventuell ureining.
Ei oppdatert risikovurdering må sendast til Statsforvaltaren før oppstart. I konklusjonen tek Statsforvaltaren atterhald om at det kan verta kravd ytterlegare tiltak om det vert naudsynt.
HF gjer merksam på at redaktør Sigbjørn Linga eig ein fritidsbustad ved Bjølsegrøvatnet. Red.
