Gløymde å ta initiativ
For eitt år sidan vedtok heradsstyret at Kvam skal ta initiativ til ein regional energi- og klimaplan. Ingenting hende før oppfylginga vart etterlyst.
Rådmann Anita Hesthamar vedgår at det er gjort ein feil og at vedtaket ikkje er fylgt opp. Berre trongen for ein regional plan for forvalting av Hardangerfjorden er spela inn til Hardangerrådet.
Rådmannen har, etter at Kari Mostad (MDG) 1. juni etterlyste oppfylging, sendt vedtaket til rådet og bede om at planen vert tema i neste møte.
Vedtaket i fjor sa dessutan at rådmannen skulle leggja fram ei sak med konsekvensar av den kommunale energi- og klimaplanen, som vart vedteken i fjor. I tillegg skulle ho leggja fram prioriterte framlegg om klimatiltak for 2022–2024 i årets budsjett.
Det kom inga sak denne månaden. Rådmannen opplyste heradsstyret om at ho arbeider med å finna dei mest effektive tiltaka for å redusera utsleppa.
– Det står att å prøva om det lèt seg gjera å kvantifisera reduksjonen av dei einskilde tiltaka som er lagd inn handlingsdelen, svara Hesthamar.
I tillegg samarbeider heradet med Klimapartner Vestland om å nytta verktøyet Klimakost for å måla dei kommunale utsleppa. Heradet får opplæring denne månaden.
Arbeidet er ikkje kome langt nok til å spegla seg i utkastet til økonomiplan, som vart vedteke av dei folkevalde 14. juni.
