– Gjorde vedtak på feil grunnlag
Grannar meiner at eit byggjeløyve vart gjeve basert på feilaktig informasjon. No ber dei Statsforvaltaren om å senda klagesak i retur for ny handsaming.
Det går fram i ein e-post Kirsten og Arild McClellan Steine har sendt til Statsforvaltaren. Dei meiner at Kvam herad gjorde vedtak bygt på på feil informasjon då klagen deira på eit byggjeløyve til Hardanger fartøyvernsenter vart avvist i haust.
Ekteparet ber om at klagen, som ligg til avgjerd hjå Statsforvaltaren, vert handsama på nytt, og på rett grunnlag.
Steine er næraste naboar til Kulturnaustet, som skal reisast ved Hardanger fartøyvernsenter. Både ekteparet og dei andre naboane i bygget er uroa over ulemper bygget vil gje. Då dei klaga på vedtaket på grunn av utfordringar med innsyn frå det nye bygget til seg sjølve, vart klagen kjapt avvist.
I e-posten hevdar naboane at ny informasjon slår beina vekk under eit av hovudargumenta som låg til grunn for avslaget. Argumentet dreiar seg om gjenbruk.
I vedtaket som vart gjort 19. september, skriv rådmannen nemleg at «ser ein ulempene med innsyn opp mot tiltakshavar sin fordelar av gjenbruk av eksisterande bygningsmasse til utvikling av Hardanger fartøyvernsenter er ulempene ikkje tungtvegande nok til å avslå eller kreve alternative løysingar.» Dette stiller naboane seg undrande til.
I eit møte mellom utbyggar og naboane 23. november stadfesta fartøyvernsenteret at konseptet med gjenbruk ikkje lenger er del av prosjektet. Ifylgje Arild McClellan Steine vart det stadfesta at materialane frå det gamle Ica-bygget er selde og køyrde vekk.
Heidi E. Ørjansen, leiar for plan og byggjesak i Kvam, uttala til HF 7. desember at heradet ikkje var kjent med dette. Ørjansen opplyste at fasaden mot naboane i teorien kunne ha vore endra meir når ståldragarane fyrst er rivne og prosjektet ikkje må ta omsyn til det opphavlege bygget.
Grannane meiner at saka, basert på kommentarane frå heradet, bør sendast i retur til Kvam herad for å sikra at ho vert handsama av to instansar med korrekt informasjon.
