Gjorde unntak frå alkoholføringar: – Hadde nok tid

Dei alkoholpolitiske retningslinene slår fast at søknader om utvida skjenkjeareal skal sendast seinast to veker før den aktuelle tilskipinga. Om arrangementet skal vera i ein idrettshall, der det i utgangspunktet ikkje skal skjenkjast alkohol, må søkjaren grunngje kvifor ikkje andre lokale kan nyttast.

Søknaden frå Holmatun AS om å utvida skjenkjearealet til å omfatta idrettshallen i samband med ein jubileumsfest i regi av Elkem Bjølvefossen i Norheimsund idrettshall kom ni dagar før arrangementet. Han inneheld inga grunngjeving. Likevel har Kvam herad godkjent han.

Leiar for alkohol og servering i Kvam herad, Nils Anders Bolstad, opplyser at fristen på to veker skuldast at ein skal ha tid til forsvarleg sakshandsaming og gjennomgang av vaktordninga. Ettersom festarrangøren, eit føretak i Bergen, var for seint ute med å søkja om einskildløyve, tilrådde Bolstad føretaket i staden å nytta ein etablert skjenkjestad i Kvam som har orden på skjenkje- og vaktrutinar.

Ifylgje Bolstad har Kvam herad i nokre tilfelle handsama søknader som har kome for seint, dersom sakshandsaminga er mindre omfattande. Det var altså tilfellet her. Når det gjeld søknader om einskildløyve, som krev meir sakshandsaming, har det ikkje vore gjort unntak frå fristen, fortel han.

Han opplyser at det skal serverast middag til inntil 300 gjester på festen. I slike tilfelle har ein få andre mogelegheiter enn å nytta idrettshallen om festen skal haldast i Kvam.

– Idrettshallane i bygda framstår som det einaste reelle alternativet, og ein har same vurdering når det gjeld til dømes større konsertar, opplyser Bolstad.

Han fortel at heradet har vore i munnleg dialog med arrangøren om alternative stader, og at alternativet ville vore å flytta festen ut av Kvam. Det synest han ville vore dumt når brotet på formalitetane i praksis ikkje hadde noko å seia.