Gjorde tom emballasje om til gåver
Mykje som vert kasta i bosset, kan verta fine julegåver. Det har borna i Ålvik barnehage lært dei siste vekene.
Elma Kurbasic-Montoya er assistent i Ålvik barnehage. Ho fortel at sidan i haust har barnehagen jobba med å gjera både dei tilsette og borna meir miljøbevisste. Då adventstida kom og julegåver skulle lagast, var det naturleg å satsa på gjenbruk. Difor har borna lært at om ein pyntar tomme boksar som til dømes har innehalde chips eller sjokolade, kan desse verta julegåver.
Øver på å sortera
Dei tilsette har òg laga ei pappøskje som representerer havet. Til å byrja med var den full av boss, men utan fiskar. Så har borna sakte, men sikkert fjerna bosset og i staden hengt opp fiskar.
– På den måten skal dei læra at når havet er reint, er det kjekkare å vera fisk, seier Kurbasic-Montoya.
Borna i Ålvik har lært å kjeldesortera. Takka vere ein bossdunk med eigne rom til glas, metall, papp og plast øver borna dagleg på sortering.
– På den måten får borna kjenna meistringskjensle når dei skjønar kva boss som skal i kva dunk. Me brukar òg tid på å fortelja om kvifor me sorterer bosset og kvifor det er viktig å resirkulera, seier Kurbasic-Montoya.
Ut i verdsrommet
Etter nyttår skal undervisninga forlata denne planeten.
– Då skal me læra om verdsrommet. Me skal mellom anna syna borna korleis jordkloden ser ut frå verdsrommet og korleis planeten vert om me ikkje tek vare på miljøet. Det første temaet me tok for oss i haust, var havet. Du kan seia at me prøver å ha ein slags raud tråd gjennom året. Me byrja i havet og endar opp i verdsrommet, seier Kurbasic-Montoya.
Til våren skal foreldreutvalet fokusera på gjenbruk ved å arrangera loppemarknad. Barnehagen skal også arrangera reparasjonsverkstad. Der kan borna ta med øydelagde leiker eller klede og læra korleis dei kan reparerast.