Gjorde salmar til englar
Det var ikkje kamp om plassen då det skulle brettast englar på biblioteket i Norheimsund tysdag. Men dei som var til stades, fekk sikra seg litt jolepynt.
I samband med gjenbruksveka i regi av Bir arrangerer ulike lag og organisasjonar tilstellingar med fokus på eit mindre og meir berekraftig forbruk og auka gjenbruk 21.–27. november. Tidlegare lærar i Kvam, Agnethe Mohn, tok turen frå Storetveit i Bergen til Norheimsund for å bidra. Ho synte at ei gamal bok kan verta til ny pynt.
– Sjå kor fine dei vert! seier Mohn, og syner fram to små englar som dinglar i ein tråd.
Ho hadde ein bunke med salmar frå ei bok liggjande framføre seg. Den eine sida etter den andre vart bretta med drivne hender. I byrjinga tykte Agnethe Mohn at det var litt fælt å «øydeleggja» salmebøker, men det har etter kvart gått seg til, forklarar ho.
Resultatet av brettinga syner at ein ikkje treng kjøpa dyrt og fint papir for å laga pynt. Ei side frå ei gamal bok kan gjera same nytten, meiner Mohn.
Få frammøtte
Då HF tok turen innom «brettekvelden», var berre bibliotekar Solveig J. Valland og Mohn i lokalet. Det manglande frammøtet såg ikkje ut til å påverka humøret til Mohn.
– Eg sit her og brettar, så ser me om det dukkar opp nokon etter kvart, seier ho.
Englane lærte ho å laga på ein joleverkstad i kyrkjelyden på Storetveit. Sidan då har ho lært bort kunsten til andre i både inn- og utland, fortel ho.
Mohn har ei sterk tilknyting til Kvam, og har hatt hytte på Aksnes sidan 1949. I løpet av tida i Kvam har ho jobba som lærar i til saman 19 år – 1 år i Vikøy og 18 i Norheimsund.
Den tidlegare lærarinna har mellom anna hatt til dottera til Valland, Marit, som elev. Mohn bretta nokre englar som ho bad Valland om å gje til dottera. Då biblioteksjef Ragna Helen Soldal såg desse, kontakta ho Mohn.
– Ho syntest at dei var så fine at ho inviterte meg til Norheimsund for å læra det vekk til andre, seier «bretteeksperten».
Etter ei stund dukka ukrainske Katerina Melnik opp ved bordet. Ho skulle på språktreff på same stad, men møtte tidleg opp for å få med seg arrangementet. Melnik fortel at ho er kreativ, men helst i digitale former. I Ukraina jobba ho som UX-designar, som mellom anna inneber å utvikla nye appar.
– Men det er kjekt å gjera andre ting òg, seier Melnik.
Besteforeldreaksjon
Mohn var ikkje vond å be om å møta opp på tilstellinga, særskilt ikkje sidan temaet var gjenbruk. Det er ho svært oppteken av. Ho vøler det ho kan og handlar mykje på mellom anna Fretex, fortel ho.
Ho er også engasjert i Besteforeldrenes klimaaksjon, som er ein tverrpolitisk organisasjon som vil motverka menneskeskapa global oppvarming.
– Det er viktig å tenkja på framtida til både barneborn og oldeborn, understrekar Mohn.
I gjenbruksveka stiller biblioteka ut litteratur som handlar om gjenbruk og redesign. I tillegg til englebrettinga påbiblioteket i Norheimsund stod Brita Træbakken for kurs i redesign og reparasjon av klede onsdag. Sundag 4. desember arrangerer Kvam Langrenn- og Skiskyttarklubb den årlege skibytedagen i Norheimsund idrettshall.
