– Gjev unntaksvis løyve etter fristen
Søknader om utvida skjenkjeareal skal sendast seinast to veker på førehand, men Kvam herad gjer unntak frå regelen.
Seinast i mars gjorde heradet unntak for ein skjenkjestad som ville utvida skjenkjearealet til å omfatta ein etasje til.
Søknaden kom fyrst 11 dagar før arrangementet. I utgangspunktet skal det innebera avslag, ettersom dei alkoholpolitiske retningslinene seier at søknad «om skjenke- og salsløyve for einskilde høve, utviding av sals- og skjenkeområde og utviding av alkoholgruppe skal vera levert til kommunen seinast to veker før løyvet skal takast i bruk».
Sjølve retningslinene seier ikkje noko om unntak frå reglane, men Kvam herad har likevel gjort fleire slike unntak, opplyser leiar Nils Anders Bolstad i eining for alkohol og servering.
Årsaka er at det ikkje alltid trengst 14 dagar for å handsama ein søknad. Det er tilfellet når ein etablert skjenkjestad med godkjende vakter søkjer. Då trengst ikkje ei fråsegn frå politiet, sjølv om dei alkoholpolitiske retningslinene seier at kvar einskild søknad skal sendast på høyring til politiet.
Bolstad opplyser at politiet automatisk, gjennom det digitale søknadssystemet, får kopi av alle søknader. Dette går vel å merka ikkje fram av arkivsaka i innsynssystemet på den kommunale heimesida.
