Gjev truleg handsrekking til kyrkja

Også i 2023, som året før, gjekk kyrkja med dundrande underskot. Nærare bestemt er det på nær 1,1 millionar kroner.

Difor har kyrkjeverje Olav Skeie Lid, etter vedtak i fellesrådet i mai, søkt Kvam herad om ei ekstra løyving for å kvitta seg med underskotet.

– Dette er inga kjekk øving. Det er heilt klart eit stort ynske for kyrkja å opparbeida oss økonomi til å sleppa desse kanossagangane. Men enn så lenge lyt eg gå den tunge veg – og vonar på ei handsrekking nok ein gong, skreiv han i søknaden 22. mai.

Vil venta og sjå

I formannskapsmøtet 13. januar, der den fyrstnemnde rapporten vart drøfta, etterlyste varaordførar Frode Nygård (Frp) meir informasjon om saka. Rådmannen opplyste at ho ynskjer å sjå nærare på årsakene til underskotet.

Ifylgje rådmannen kom søknaden eigentleg altfor seint til å verta del av 1. tertialrapport, ettersom talmaterialet skal vera klart tidleg i mai. Han er likevel så vidt nemnd. Rådmannen skriv at ho vil koma tilbake til han i 2. tertialrapport. I mellomtida vil ho sjå nærare på den kyrkjelege økonomien, mellom anna på ein eventuell sparegris.

– Me må sjå på kva grep kyrkja tek. Eg har stor sympati for utfordringane, sa Hesthamar.

Tek grep straks

Ap, KrF og Frp føreslo i formannskapsmøtet å løyva ein halv million kroner straks for å betra kyrkjelikviditeten, og å be rådmannen koma attende til saka i 2. tertialrapport. Dette stilte heile formannskapet seg bak.

Varaordførar Frode Nygård (Frp) meiner det er grunn til å rydda opp med det same. Han viste til at underskotet mest skuldast pensjonskostnader, ikkje dagleg drift, og at utfordringar vil melda seg utan ei rask kommunal løyving.

Kyrkja har tidlegare fremja ynske om betre dialog med den kommunale leiinga. I søknaden om dekking av underskotet gjentek Lid ynsket.

– Eg inviterer gjerne til visitt her i kyrkja med innlagt kulturprogram frå øvste hylle, og med høge smørbrød – dersom de finn tid til dette i dykkar travle kvardag. Gje ein lyd om de finn ei smoge i kalenderen, skriv kyrkjeverja.

Smoga vart altså ikkje funnen før formannskapsmøtet.

Saka vert avgjord som del av tertialrapporten i heradsstyremøtet 20. juni.

– Litt uverdig

Det var 8. mai fellesrådet vart samd om å be Kvam herad om ei hjelpande hand. I det same møtet drøfta rådet årets fyrste kvartalsrapport, som syner eit førebels underskot på 533.000 kroner. Mellom årsakene er høgt straumforbruk med høge prisar og auke i pensjonspremien.

– Pensjonskostnadene er heilt klart den enkeltfaktoren som i størst grad knekkjer økonomien vår. Dei har stige med 300 prosent på tre år, skriv kyrkjeverja i saksutgreiinga.

Rådet tok rapporten til vitande, men vedtok otte over mangelen på samsvar mellom ressursane og oppgåvene. Kyrkjeverja fekk i oppdrag å ha dialog med heradet om dette snarast. Det snaraste toget er altså allereie gått.

– Drifta er hardt pressa og framstår som underfinansiert. Me har redusert kraftig på personalsida, og teke ned kostnadar alle stader – men det monnar likevel ikkje. Me kjenner heradet si vanskelege økonomiske stilling, og har forståing for at også kyrkja må ta sin del av innsparinga. Likevel kjennest det til tider nesten litt uverdig å vera så lite likvid som fellesrådet er, skriv Lid.