Gjev råd om inkludering

Den daglege leiaren i Ubuntu Coaching AS vil driva rådgjeving både éin til éin og til grupper. Ho kjem frå Sør-Afrika og har bakgrunn innan fredsbygging og antirasisme.

Ordet ubuntu tyder noko slikt som «eg er på grunn av deg, og du er på grunn av oss».

— Det handlar om å vera medmenneske og forstå at som menneske treng me kvarandre for å lukkast i livet, seier Moola-Nernæs.

Tanken om å starta for seg sjølv kom i fjor, midt i koronatida, etter mange år med flyktningarbeid.

Med kursa ho held vil ho fremja mangfald og eit inkluderande arbeidsmiljø, forståing om antirasisme og inkluderande leiarskapstrening.

Vil styrkja mental helse

Hovudmålgruppa er yrkeskvinner med innvandrarbakgrunn som ynskjer å vera velfungerande medlemer i samfunnet og bidra til velferdssamfunnet.

— Men etter å ha coacha yrkeskvinner, lærte eg at det ikkje var nok å driva coaching med berre dei. Eg måtte òg arbeida med nettverket rundt dei, som mellom anna arbeidsplassar, organisasjonar, skular og kommunar, seier Moola-Nernæs.

Ho ynskjer å hjelpa innvandrarar som slit med den psykiske helsa. Ho vil skapa meir forståing for framande og kulturell sensitivitet.

Ein ynskt effekt av arbeidet er styrkt mental helse mellom innvandrarar, sterkare relasjonar mellom nye landsmenn og nordmenn og auka deltaking i arbeidslivet mellom innvandrarar.

Verksemda vil hjelpa mot tunge tankar om å vera arbeidsledig, utanfor og diskriminert, noko som bidreg til psykiske helseutfordringar. Verdiane til Ubuntu Coaching er respekt, omsorg, empati, audmjukskap og ærlegdom.

Jobba med reintegrering

Moola-Nernæs har arbeidd i over ti år med flyktningar, både i organisasjonar og i det offentlege. I 20 år har ho arbeidd for fred, antirasisme og eit meir inkluderande samfunn, det vere seg i Sør-Afrika, Nord-Irland eller Storbritannia. I Storbritannia jobba ho for Bradford Police Club for Young People, og dreiv med reintegrering i samfunnet av ungdom som hadde kome ut av fengsel.

Verksemda vart etablert i februar. Ho treng stønad til å reklamera for verksemda og til å få fagleg påfyll til å levera profesjonell coaching. Verksemda treng å vera synleg i sosiale medium og på ein profesjonell nettstad, opplyser Moola-Nernæs.

Ho søkte difor kraftfondet i Kvam herad om ein stønad på til saman 80.000 kroner for åra 2021 og 2022. Det enda med 40.000 kroner då heradsstyret fordelte pengar 9. november.

Arbeidde med flyktningar

Tidlegare jobba Moola-Nernæs i Hordaland Røde Kors med kontor i Øystese som flyktninggaidkoordinator. Seinare arbeidde ho som fagleiar og flyktningkoordinator i tidlegare Fusa kommune. Etter samanslåinga av Os og Fusa var ho spesialkonsulent i Bjørnafjorden kommune. Der slutta ho i sommar for å byrja i eige firma.

— Eg har teke kontakt med Nav, Vaksenopplæringa og forskjellige andre i kommunen for å tilby tenestene mine, men eg har òg som mål å arbeida med det private næringslivet, fortel Moola-Nernæs i eit straumbrev til HF.

For ei tid sidan fekk ho ein skade i akillessena då ho sparka fotball. Difor sat ho med foten i gips og jobba via Zoom då HF snakka med henne.

Ein retreat for kvinner som sørafrikanaren skal arrangera på Hardangerfjord Hotel i Øystese, er utsett til 21. — 23. januar.

— Me må støtta det lokale næringslivet og reklamera for Kvam, seier ho.